Trajneri i Manchester City, Pep Guardiola, si dhe ai i Arsenal, Mikel Arteta, kanë komentuar duke thënë se sfida direkte mes ekipeve në Premier League nuk do të jetë përcaktuese në garën për titull kampion. Arsenal kryeson momentalisht renditjen e përgjithshme me 5 pikë diferencë nga City i vendit të dytë. Megjithatë, “qytetarët” kanë 2 ndeshje më shumë për të luajtur, duke përfshirë këtu edhe përballjen direkte.
Guardiola u shpreh për mediat në prag të sfidës:
“Ndeshja është mjaft e rëndësishme, por jo deçizive sepse ka ende shumë ndeshje për t’u luajtur…”
Tekniku spanjoll gjithashtu komentoi mbi marrëdhënien e tij me trajnerin e Arsenal, Mikel Arteta. Kujtojmë se dyshja ka punuar së bashku tek Manchester City, ku Arteta ishte asistent i Guardiolës. Ky i fundit tha:
“Asgjë nuk ka ndryshuar. E shohim njëri-tjetrin dhe flasim më pak, por marrëdhënia jonë është gjithmonë e lumtur… Mikel i ka çuar ata (Arsenal) në një tjetër nivel. Janë kaq kompetitivë dhe agresivë.”
Arteta ndërkohë gjithashtu ka komentuar mbi përballjen spektakolare që pritet të luhet në Etihad:
“Nëse fitojmë nesër nuk kemi fituar kampionatin. Mbase përqindja e shanseve do të kalojë në favorin tonë, por 5 ndeshje në kampionat është një situatë delikate. E dinim se do të duhej të shkonim në Etihad, do të jetë e vështirë, por a do të përcaktojë sezonin? Jo. Besimi është ende aty, pashë sesi lojtarët reaguan ndaj Southampton, ata mbrojtën njëri-tjetrin në të gjitha momentet. E duam vërtet (triumfin në Premier League) dhe do ta tregojmë kur të zbresim në fushë.”
Arteta ndërkohë ka konfirmuar se Granit Xhaka është në dyshim për ndeshjen ndaj City, dhe Saliba gjithashtu nuk ka shfaqur shenja përmirësimi që prej dëmtimit të marrë në sfidën ndaj Sporting Lisbon në Europa League. Përballja në Etihad garanton spektakël dhe gola, teksa asnjë prej ekipeve nuk mund të konsiderohet favorit i sigurtë.
