Trajneri i Manchester City, Pep Guardiola, ka thënë se ekipi i tij nuk mund t’i falë vetes asnjë gabim nëse kërkon të shpallet kampion në Premier League. “Qytetarët” siguruan përsëri vendin e parë në renditje pas fitores 3-0 ndaj Brighton, por diferenca me Liverpool mbetet vetëm 1 pikë. Teksa kanë mbetur dhe vetëm 6 takime për t’u luajtur, Pep Guardiola ka dhënë një mesazh të qartë për lojtarët e tij, duke thënë se çdo hap fals në këtë moment do t’i kushtojë City-t titullin kampion.
Guardiola deklaroi për mediat:
“Ne nuk jemi budallenj! Nëse barazojmë dhe humbasim vetëm 2 pikë Liverpool do të shpallet kampion. Nëse i fitojmë të gjitha ndeshjet kampionë do të jemi ne. Lojtarët e dinë këtë gjë. I dimë përballjet e vështira që kemi për të luajtur dhe duhet të performojmë tek të gjitha ashtu siç bëmë ndaj Brighton. Nëse e bëjmë këtë do të festojmë, nëse jo do të urojmë Liverpool.”
City dhe Liverpool kanë qënë kokë më kokë gjatë gjithë këtij sezoni, teksa të dyja përballjet direkte në kampionat janë mbyllur me rezultatin 2-2. “The Reds” ndërkohë fituan 3-2 sfidën e vlefshme për FA Cup. Ekipet janë gjithashtu në gjysmëfinalet e Champions League, dhe janë favoritë për t’u përballur përsëri me njëri-tjetrin në finale.
Përballjet në Champions do të kenë efektin e tyre në formën e skuadrave në kampionat dhe Guardiola e ka pohuar këtë gjë. Spanjolli shtoi:
“Disa vite më përpara ia dolëm të fitonim 14 ndeshje rradhazi dhe u shpallëm kampion. Nëse i fitojmë të gjitha do të shpallemi përsëri. Por kjo varet dhe nga lodhja e dëmtimet. Varet nga Champions League. E gjitha varet nga ky muaj. Ne do të bëjmë gjithçka për të dhënë më të mirën tonë në këto ndeshje.”