Unai Emery ka dhënë intervistën e tij të parë si trajneri i ri i Aston Villa, në prag të përballjes së këtyre të fundit me Manchester United në kampionat. Tekniku spanjoll është shprehur mjaft i lumtur për aventurën e re, teksa ka deklaruar se ëndrra dhe prioriteti i tij kryesor është të fitojë një trofe me klubin anglez. Kujtojmë se kjo nuk është hera e parë që Emery është në krye të një ekipi në Premier League. 51 vjeçari ishte në krye të Arsenal gjatë sezonit 2018-2019. Trajneri u shpreh për mediat:
“Ëndrra ime është të fitoj një trofe me Aston Villa. Është sfida ime personale në fillim. Ëndrra e dytë është që të luajmë në Europë.”
Emery e ka provuar disa herë veten në arenën europiane, teksa udhëhoqi Sevilla 3 herë drejt suksesit në Europa League, duke ngritur lart trofeun në sezonet 2013-2014, 2014-2015 dhe 2015-2016. Pas largimit nga Arsenal tekniku iu bashkua Villarreal ku ia doli të fitonte përsëri Europa League-ën. Emery shtoi:
“Kam luajtur përballë shumë ekipeve në botë. Për mua të përballesh me ekipet angleze është një sfidë e madhe. Premier League është mbase kampionati numër 1 në botë. Secili ekip na dha një eksperiencë në kohën që drejtoja Arsenal… Jam i lumtur që jam këtu. Vendosa të vij këtu pasi është një projekt i madh, dhe ambicia jonë do të ecë së bashku, hap pas hapi. Dua të përmirësoj ekipin, të ndihmoj me eksperiencat e mia.”
Gjithsesi Emery tha se skuadra duhet të mendojë vetëm për ndeshjen e rradhës, që do të jetë përballë United në shtëpi. Tekniku u shpreh:
“Duhet të mendojmë vetëm për ndeshjen e ardhshme pasi nuk jemi në një pozicion të mirë në renditje. Secila sfidë do të na japë shumë informacion për lojtarët. Dua t’i testoj ata individualisht dhe në grup. Takimi i rradhës është fokusi im i vetëm.”