Qendër-mbrojtësi i Liverpool, Virgil Van Dijk, ka thënë se ndihet përgjegjës për formën e dobët të “The Reds” në startin e këtij sezoni. Të besuarit e Jurgen Klopp kanë fituar vetëm 2 nga 6 ndeshjet e para në kampionat, ndërkohë që mposhtën me rezultatin e thellë 4-1 në Champions League nga Napoli. Pavarësisht fitores 2-1 ndaj Ajax, pikëpyetjet ende janë të shumta për formën e Liverpool këtë vit, dhe Van Dijk ka pranuar kritikat.
Mbrojtësi hollandez komentoi për mediat:
“Nëse ne luajmë mirë unë marr lëvdata, dhe nëse jo unë nuk marr. Por, unë ende mendoj se duhet të përmirësohem dhe kjo është okay. E vetmja mënyrë për ta bërë është të luash ndeshje, të mësosh nga gabimet, të mos dëgjosh shumë zërat e jashtëm, dhe të flasësh me njerëzit e afërt. E kam thënë disa herë, ne jemi të gjithë njerëz, dhe të gjithë duam të bëjmë më të mirën, dhe kjo vlen dhe për mua. E di që mund të luaj më mirë, por të gjithë mund të bëjmë më mirë.”
Van Dijk shtoi:
“Ndihem shumë i lënduar kur pësojmë gola dhe nuk mbajmë të paprekur portën, ndiej përgjegjësinë time, por kjo është gjë e mirë. Dua që të rikthehemi tek rezultatet e mira, jo vetëm për veten time por për të gjithë personat e lidhur me klubin.”
Shtatëlarti i Liverpool gjithashtu nuk ishte i lumtur me komentet e analistëve sportivë. Sipas hollandezit, është për të ardhur keq që ish-futbollistë të Liverpool, nuk arrijnë të kuptojnë se çdo ekip mund të ketë një periudhë apo situatë të keqe për disa ndeshje. Sidomos në një nivel loje kaq të lartë dhe intensiv. Mbrojtësi shtoi se fitorja ndaj Ajax në Champions League vërteton se Liverpool mund të luajë shumë më mirë nëse luan si ekip.
