Joao Palhinha është kthyer në objektivin kryesor në mesfushë për Bayern Munich, teksa bavarezët dështuan në afrimin e Declan Rice dhe Moises Caicedo këtë merkato. Palhinha ndërkohë mendohet se ka rënë dakord për një transferim në Gjermani, teksa lojtari ka gjetur marrëveshjen me Bayern përsa i përket termave personale të kontratës. Megjithatë, Fulham ka refuzuar ofertën hapëse të bavarezëve për lojtarin.
Bayern munich ka ofruar 47 milionë paundë për lojtarin e talentuar, por Fulham ka refuzuar menjëherë ofertën. Megjithatë, anglezët kanë thënë se do të vazhdojnë të jenë në komunikim me klubin gjerman, duke mos përjashtuar një lëvizje në një moment të dytë. Gjithsesi, Bayern thuhet se duhet të ofrojë të paktën 60 milionë paundë për kartonin e Palhinha, për të arritur akordin me anglezët. Kjo është dhe shifra që Fulham refuzoi nga West Ham, kur këta të fundit kërkuan Palhinha para disa kohësh.
Pavarësisht se për momentin Fulham ka refuzuar ofertën e Bayern për Palhinha, duket se klubi anglez po përgatitet në prapaskenë për largimin e tij, duke menduar për zëvëndësuesin e denjë. Një nga emrat më të përmendur është ai i Ibrahim Sangare. Ky i fundit aktivizohet me PSV Eindhoven dhe është gjithashtu në radarin e Nottingham Forest. Disa alternativa të tjera janë dhe Youssouf Fofana, Florentino Luis, si dhe Scott McTominay i Manchester United.
Në lidhje me marrëveshjen verbale mes Bayern dhe Palhinha, mësohet se lojtari ka rënë dakord të firmosë një kontratë për 5 vitet e ardhshme me kampionët në fuqi të Bundesliga. Fulham humbi këtë vit dhe superstarin Aleksandar Mitrovic, i cili zgjodhi të largohet drejt Arabisë Saudite. Kjo është arsyeja se përse drejtuesit e klubit kanë vendosur të jenë më të kujdesshëm në lidhje me lojtarët që lejojnë të largohen, një prej tyre dhe Joao Palhinha.
