Pavarësisht eleminimit zhgënjyes nga Champions League, Pep Guardiola është shumë afër rinovimit të kontratës dhe për 3 vite të tjera në Etihad. Trajneri spanjoll ka siguruar drejtuesit e klubit se është më i vendosur se kurrë të triumfojë në kompeticionin prestigjoz, dhe ka dëshirë të provojë përsëri fatin sezonin e ardhshëm.
Guardiola erdhi në krye të pankinës së “qytetarëve” në vitin 2016. Kjo do të thotë se spanjolli ka dështuar 6 herë për t’i dhuruar ekipit triumfin e parë në Champions League. Eleminimi i fundit nga Real Madrid i dha zë spekullimeve se Pep mund të largohej, duke qënë se kontrata e tij aktuale skadon në fund të sezonit. Por Manchester City është shumë afër nënshkrimit me Erling Haaland, një nga sulmuesit më në formë të momentit. Guardiola nuk do ta humbasë mundësinë për të bashkëpunuar me bomberin e Dortmund, dhe kjo mund të jetë një arsye madhore për rinovimin e kontratës.
Që prej largimit të Sergio Agueros drejt Barcelonës, Cityt i ka munguar një sulmues tipik në ekip. Kjo ka detyruar Guardiolën të luajë me module loje alternative, duke vendosur shpesh herë Jesus apo De Bruyne në qendër të sulmit. Kualiteti i Erling Haaland mund të rezultojë copëza që i ka munguar prej kohës “qytetarëve”, në rrugën e tyre drejt lavdisë europiane.
Megjithatë, trajneri i Manchester City duhet të mendojë fillimisht për ndeshjet e mbetura në kampionat. Liverpool gjendet vetëm 1 pikë larg tyre dhe gabimi mund të rezultojë fatal në garën për titullin kampion të Premier League. Ndeshja e rradhës e City do të jetë ajo përballë Newcastle, një kundërshtar që është përmirësuar ndjeshëm në javët e fundit. Guardiola e di mirë se motivimi do të luajë një rol të rëndësishëm në këtë sfidë, dhe spanjolli duhet të bëjë maksimumin që të tijët të harrojnë shijen e hidhur të disfatës ndaj Real.