Bayern Munich dhe Tottenham kanë arritur një marrëveshje verbale për transferimin e Harry Kane tek klubi gjerman. Bavarezët do t’i paguajnë Tottenham plot 100 milionë euro për shërbimet e sulmuesit, dhe tani gjithçka është në dorën e vet lojtarit, i cili duhet të vendosë nëse do apo jo të largohet nga klubi londinez.
Harry Kane është golashënuesi më i mirë i të gjitha kohërave për Tottenham, me 280 gola në 435 takime. E ardhmja e sulmuesit në Londër ka qënë prej kohësh në dyshim, teksa presidenti Levy ka refuzuar disa herë oferta nga klube të ndryshme europiane. Përpara interesit të Bayern, kapiteni i kombëtares angleze ishte në shënjestrën e Manchester United. Megjithatë këta të fundit u tërhoqën shpejt nga gara.
Një nga arsyet është dhe hezitimi i presidentit të Tottenham për t’i shitur Kane një tjetër klubi rival në Premier League. Rasti më konkret ishte ai i vitit 2021, kur Manchester City shprehu interes konkret për Kane, si dhe vet lojtari ishte dakord për një transferim në Etihad. Megjithatë, Daniel Levy ndërpreu bisedimet me City duke e konsideruar Kane të pashitshëm.
Megjithatë, tashmë që sulmuesi ka vetëm 1 vit të mbetur në kontratën e tij me spursat, duket se klubi londinez ka vendosur të përfitojë financiarisht nga shitja e kartonit të tij, duke shmangur largimin me kosto zero, të lojtarit të tyre më të mirë.
Kane ka shënuar 213 gola në Premier League, dhe i duhen vetëm 48 të tjerë për të thyer rekordin e Alan Shearer, për më shumë gola të shënuar në kampionatin anglez. Megjithatë, lojtari nuk ka fituar asnjë trofe madhor me Tottenham, ndërkohë që Bayern është vazhdimisht ekip që siguron trofe, si në Gjermani, ashtu dhe në Europë. Kjo do të thotë se Kane është përballë një zgjedhjeje të vështirë, por sipas të gjitha gjasave, bomberi anglez do të pranojë ofertën e gjigandëve bavarezë.
