Drejtuesit e Bayern Munich i kanë bërë të qartë Tottenham, se presin një vendim mbi kartonin e Harry Kane. Bavarezët ende nuk janë të qartë nëse spursat duan që të shesin bomberin e tyre, ndërkohë që sipas prestigjozes Bild, vet lojtari ka pranuar termat personale të kontratës me klubin gjerman.
Drejtuesit e Bayern janë të frustruar me situatën dhe i kanë vendosur Tottenham një afat për të kthyer përgjigje, por nuk dihet nëse bavarezët do të heqin dorë nga Kane në rast se ky afat tejkalohet nga Tottenham. Klubi londinez ndërkohë nuk ka komentuar mbi situatën. Kane ka vetëm 1 vit të mbetur në kontratën e tij aktuale me klubin, dhe deri më tani nuk ka pasur asnjë shenjë për një rinovim të mundshëm.
Kjo do të thotë se nëse Kane nuk vendos të rinovojë, dhe presidenti i klubit Daniel Levy vendos të mbajë bomberin anglez në ekip, Tottenham do të humbasë mundësinë e fundit për të përfituar para nga kartoni i sulmuesit. Drejtuesit e Bayern Munich u takuan me Levy përpara disa ditësh, por mes palëve nuk u arrit dot një marrëveshje.
Kujtojmë se merkatoja verore mbyllet zyrtarisht në datë 1 shtator, gjë që i jep mjaftueshëm kohë klubeve për të gjetur një zgjidhje. Megjithatë, palët duan të arrijnë në një konkluzion përpara startit të sezonit të ri. Sipas raportimeve të mëparshme, Bayern Munich ka bërë një ofertë prej 70 milionë paundësh për shërbimet e Kane, por sipas burimeve të brendshme të Tottenham, kjo ofertë nuk ka ardhur ndonjëherë zyrtarisht në zyrat e klubit.
Tashmë, drejtuesit bavarez pritet të bëjnë një tjetër ofertë për Kane, që pritet të jetë dhe e fundita. Për sulmuesin interesohet dhe Manchester United, por duket se “Djajtë e Kuq” nuk e kanë në focus kryesor kapitenin e kombëtares angleze.