Bayern Munich ka piketuar “zëvëndësuesin e ëndrrave” për Robert Lewandowskin, dhe bëhet fjalë për bomberin e Tottenham, Harry Kane. Pas largimit të sulmuesit polak drejt Barcelonës, klubit bavarez i ka dalë detyra e vështirë e gjetjes së një zëvëndësuesi në të njejtin nivel me Lewandowski.
Drejtori dhe ish-portieri legjendar i Bayern Munich, Oliver Kahn, ka përmendur emrin e Kane, duke e cilësuar atë si një ëndërr për të ardhmen e klubit gjerman. Kahn u shpreh për prestigjozen Bild:
“Ai (Kane) ka ende një kontratë aktive me Tottenham. Ai është një sulmues i jashtëzakonshëm, por kjo mbetet një ëndërr për të ardhmen… Tani për tani duhet të bëjmë ekipin së bashku për sezonin aktual. Kështu që le të shohim se çfarë do të ndodhë.”
Kapiteni i kombëtares angleze pritet të qëndrojë tek Spurs-at dhe këtë sezon, pavarësisht dëshirës për t’u larguar që vet Kane shfaqi sezonin që lamë pas. Trajneri Antonio Conte duket se ia ka mbushur mendjen sulmuesit që të vazhdojë aventurën e tij tek Tottenham, kjo falë dhe kualifikimit të skuadrës në Champions League.
Kane ka dhe 2 vite të mbetura në kontratën e tij aktuale me Tottenham, dhe presidenti i klubit, Daniel Levy, ka dëshirë që të diskutojë një rinovim kontrate me bomberin. Por situata bëhet shumë interesante vitin e ardhshëm, nëse Kane nuk pranon rinovimin. Presioni mbi klubin anglez do të rritet duke qënë se aseti i tyre më i çmuar mund të largohet me kosto zero. Shumë gjëra do të varen nga ecuria e Tottenham në sezonin e ri. Kane e ka thënë hapur në disa raste se objektivi i tij kryesor është të fitojë trofe, dhe Spurs-at nuk ia kanë mundësuar dot këtë deri më tani. Bayern Munich nga ana tjetër janë fitues serialë dhe është e pamundur që bomber i “3 Luanëve” të mos joshet nga oferta e mundshme e gjermanëve.
