Kombëtarja e femrave të Anglisë ka shkruar me gërma të arta emrin e vet në historinë e futbollit, pas triumfit në finalen e Euro 2022. Fitorja erdhi pikërisht përballë rivaleve historike të Gjermanisë, që janë dhe 8 herë kampione në këtë kompeticion.
Takimi ishte mjaft i balancuar dhe kjo u pasqyrua dhe nga rezultati i takimit. Goli i parë do të vinte vetëm në minutën e 62’ të sfidës, teksa Ella Toone që zbriti në fushë si zëvëndësuese kaloi në avantazh Anglinë. Por Lina Magull do të vendoste barazpeshën në fushë në minutën e 79’, duke i dhuruar përfaqësueses gjermane një gol mjaft të rëndësishëm. Asgjë nuk do të ndryshonte deri në fund të kohës së rregullt, dhe skuadrat u bënë gati për 30 minuta shtesë.
Por edhe në kohën shtesë loja do të kishte të njejtën formë, teksa ekipet u treguan të kujdesshme për të mos pësuar gol. Gjithsesi, në minutën e 110’ të takimit, Chloe Kelly shfrytëzoi rrëmujën në zonën kundërshtare pas një goditje nga këndi, duke dërguar topin në rrjetë. Goli i avantazhit për Anglinë çoi në atmosferë deliri rreth 87,200 fansa në mitikun Wembley, teksa “3 Luaneshat” ishin tashmë vetëm 10 minuta larg triumfit në Euro 2022.
Rezultati nuk do të ndryshonte deri në fund të takimit dhe Anglia e Sarina Wiegman realizoi ëndrrën e shumëpritur, duke ngritur lart një trofe të rëndësishëm në shtëpinë e vet. Fitorja erdhi 56 vite pasi Anglia e meshkujve triumfoi në Kupën e Botës ndaj Gjermanisë Perëndimore. Ky ishte i vetmi trofe madhor që kombëtarja angleze e meshkujve apo e femrave kishte fituar deri në këtë pikë.
Triumfi ishte mëse i merituar për “luaneshat” të cilat shfaqën një formë fantastike përgjatë gjithë kompeticionit, duke mos lënë asnjëherë vend për dyshim, se cili ishte ekipi favorit për të ngritur lart trofeun.
