Pavarësisht interesimit nga klube në Premier League për kartonin e tij, duket se Lautaro Martinez do të rinovojë kontratën e tij me Inter. Zikaltërit kanë dashur prej kohësh të “lidhin” superstarin e tyre me një tjetër kontratë afatgjatë në San Siro, pavarësisht se kontrata aktuale e Lautaro skadon në vitin 2026.
Chelsea, Manchester United, si dhe Real Madrid në Spanjë kanë shprehur interes për sulmuesin argjentinas. Përfaqësues të klubeve angleze gjithashtu kanë zhvilluar bisedime me agjentët e lojtarit gjatë muajve të kaluar, për një transferim të mundshëm në Premier League. Pavarësisht kësaj, duket se Inter kërkon që Lautaro të firmosë një kontratë të re, mundësisht para verës së vitit të ardhshëm.
Sipas mediave italiane, duket se dhe vet Martinez është i gatshëm ta hedhë tashmë këtë hap, pas një starti mjaft të mirë të sezonit me Inter. Lautaro ka shënuar 13 gola në po kaq paraqitje në Serie A, teksa Inter kryeson renditjen e përgjithshme. Presidenti i Inter, Beppe Marotta, gjithashtu konfirmoi dëshirën e lojtarit për të firmosur një kontartë të re. Marotta u shpreh:
“Lautaro ka shprehur në disa raste se dëshiron të qëndrojë këtu për një kohë të gjatë. Ai është një lojtar të cilin ne e duam në qendër të projektit tonë në të tashmen dhe në të ardhmen. Jemi të sigurtë se vullneti nga të dyja palët është për të vazhduar së bashku, dhe atëhere bëhet më e lehtë.”
Martinez shënoi një gol mjaft të rëndësishëm në përballjen ndaj Juventus në kampionat, duke barazuar kështu sfidën dhe duke i dhënë mundësinë Inter të ruajë vendin e parë në renditjen e kampionatit italian. Lautaro u shpall kampion bote me kombëtaren argjentinase në botërorin e Katarit dhe tashmë kërkon të njejtën lavdi dhe në arenën e futbollit të klubeve, duke ndihmuar Inter të triumfojë në Itali por dhe në Europë.