Nicolo Zaniolo dhe Sandro Tonali janë larguar nga kampi italian dhe nuk do të jenë të disponueshëm për 2 ndeshjet e ardhshme. Vendimi ka ardhur pas investigimit të hapur nga prokuroria italiane mbi 2 lojtarët. Autoritetet zyrtare ende nuk kanë dhënë detaje se përse po zhvillohet ky investigim, por sipas zërave më afër situatës, dyshohet se lojtarët mund të jenë të përfshirë në bastvënie të jashtëligjshme.
Federata italiane e futbollit bëri me dije se lojtarët nuk janë në kondicionin e duhur për të luajtur në 2 kualifikueset e rradhës për kampionatin europian që do të zhvillohet vitin e ardhshëm. Lajmi vjen një ditë pas publikimit të një tjetër informacioni të bujshëm, ku sipas federatës italiane të futbollit, mesfushori i Juventus, Nicolo Fagioli, dyshohet se ka përdorur një sërë identitetesh false, për të vendosur baste sportive në faqe ilegale. Ndërkohë në lidhje me Tonali dhe Zaniolo, federata italiane u shpreh:
“Pavarësisht natyrës së urdhrit investigativ, duke marrë shkas nga situata, dy lojtarët nuk janë në gjendjen e duhur për të përballuar ndeshjet në ditët e ardhshme. Për këtë arsye, federata ka vendosur…t’i lejojë ata të kthehen pranë klubeve respektive.”
Italia do të përballet fillimisht me Maltën, përpara se të udhëtojë më pas drejt Anglisë, në ndeshjen e vlefshme për grupin C. Italianët janë të dytët në renditjen e përgjithshme të grupit, 6 pikë prapa Anglisë kryesuese. Italia ka po aq pikë sa Ukraina dhe Maqedonia e Veriut, megjithatë, me një ndeshje më shumë për të luajtur.
Mungesat e Tonali dhe Zaniolo pritet të kenë ndikimin e tyre tek kombëtarja, dhe trajneri Luciano Spalletti do të duhet të mendojë për zgjidhje të tjera alternative. Ndërkohë në lidhje me vendimin përfundimtar mbi akuzat e ngritura, do të duhet ende të presim.
