Drejtori sportiv i RB Leipzig, Max Eberl, ka thënë se ende nuk ka asnjë marrëveshje konkrete mes klubit dhe Manchester City, për transferimin e mbrojtësit kroat Josko Gvardiol. Talenti i Leipzig vlerësohet në shifrat e 86 milionë paundëve, dhe nëse City do të paguajë këtë shifër për shërbimet e tij, Gvardiol do të bëhej zyrtarisht mbrojtësi më i shtrenjtë në historinë e futbollit. Gjithsesi, duket se ka ende shumë për t’u diskutuar mes klubeve. Eberl u shpreh:
“Momentalisht jemi ende shumë larg. Ashtu si mund ta shihni, Josko është këtu, pra nuk është i vërtetë (lajmi për transferimin e tij tek Manchester City). Ai nuk ka bërë një kontroll mjekësor, të paktën në dijeninë tonë. Dhe nuk mendoj se e ka bërë as vet një të tillë, pasi ai është një profesionist. Nuk ka asnjë marrëveshje…”
Përpara disa ditësh Eberl konfirmoi se klubi gjerman është në bisedime me drejtuesit e City për një marrëveshje të mundshme. Megjithatë
Që prej transferimit të tij tek Leipzig në vitin 2021, Gvardiol ka zhvilluar 87 paraqitje me ekipin gjerman. Megjithatë, bujën më të madhe mbrojtësi e bëri me përfaqësuesen kroate gjatë botërorit të Katarit. Kroacia u rendit e treta në Kupën e Botës dhe kontributi i Gvardiol ishte mjaft i rëndësishëm në këtë sukses.
Momentalisht, rekordi i transferimit për mbrojtësin më të shtrenjtë në historinë e futbollit e mban Harry Maguire. Anglezi iu bashkua Manchester United në vitin 2019 për shifrën e 80 milionë paundëve. Megjithatë, nëse mes City dhe Leipzig arrihet një marrëveshje, pritet të vendoset një rekord i ri. Ndërkohë, klubi i Pep Guardiolës do të bëhej akoma më i vështirë për t’u sfiduar në Premier League, pavarësisht faktit se dhe ekipet e tjera kundërshtare kanë bërë përforcimet e tyre në këtë merkato vere.
