Trajneri aktual i kombëtares gjermane, Julian Nagelsmann, ka firmosur një rinovim kontrate me Federatën Gjermane të Futbollit, deri pas botërorit të vitit 2026. Nagelsmann u vendos në krye të pankinës së Gjermanisë vitin e kaluar, pas largimit të Hansi Flick. Kontrata e tij e parë pritej të skadonte pas Europianit të këtij viti, por duket se drejtuesit e federatës kanë tashmë besim se Nagelsmann është njeriu i duhur për të udhëhequr përfaqësuesen drejt sukseseve.
Vet trajneri u shpreh mjaft mirënjohës për mundësinë që iu dha. Nagelsmann e komentoi kështu rinovimin:
“Ky është një vendim nga zemra ime. Të udhëheqësh kombëtaren është një nder i madh.”
Kombëtarja gjermane mund të thuhet se po kalon një moment të vështirë, teksa në dy kompeticionet e fundit madhore, nuk ka mundur dot të kalojë përtej fazës së 1/16-ave. Kujtojmë se gjermanët nuk kanë mundur të kalojnë dot fazën e grupeve në dy botërorët e fundit. Kualifikimet për kupën e botës 2026 nuk kanë nisur ende. Kompeticioni do të hostohet nga Shtetet e Bashkuara të Amerikës, Kanadaja dhe Meksika. Ndërkohë në europianin e këtij viti, Gjermania do të përballet me Skocinë, Hungarinë dhe Zvicrën.
Përpara shpalljes së lajmit mbi rinovimin, Julian Nagelsmann u përfol për një rikthim të mundshëm tek Bayern Munich. Ndërkohë emri i teknikut gjerman gjithashtu u përfol për marrjen e drejtimit të Manchester United.
Nga ana tjetër, lajmin për rinovimin e Nagelsmann e ka komentuar dhe drejtori i Federatës Gjermane të Futbollit, Bernd Neuendorf. Ky i fundit tha për mediat:
“Fakti që Julian Nagelsmann do të jetë trajner i kombëtares edhe pas europianit është një sinjal i fortë për vet kombëtaren dhe federatën. Kjo pasi ai është në listën e dëshirave të shumë klubeve të mëdha, në mbarë Europën. Tani po ecim me siguri dhe të gjithë mund të përqëndrohen për një performancë të suksesshme në europian.”