Paul Pogba është pezulluar përkohësisht nga futbolli i luajtur për shkak të thyerjes së disa rregullave anti-doping. Lajmi është konfirmuar zyrtarisht nga tribunali italian anti-doping, i cili është njëkohësisht autoriteti që ka fuqinë për të pezulluar atletët. Pogba iu nënshtrua një testi pas fitores 3-0 të Juventus ndaj Udinese, dhe rezultatet e testit treguan një nivel më të lartë testosteroni se ai i zakonshëm.
Juventus gjithashtu reagoi me një deklaratë zyrtare për ngjarjen. Klubi italian komentoi:
“Juventus bën me dije se lojtari Paul Pogba ka marrë një pezullim nga tribunal kombëtar anti-doping, pas marrjes së rezultateve nga analizat e kryera në datën 20 gusht 2023. Klubi ka të drejtë të vlerësojë vendimin.”
Autoritetet italiane u shprehën se në metabolizmin e Pogba u gjetën metabolite testosteroni, të cilat vërtetojnë se hormoni është marrë në mënyrë artificiale nga jashtë. Testosteroni është një hormon që ndikon në shkallë të konsiderushme tek atletët, duke rritur nivelet e rezistencës dhe forcës fizike.
Kujtojmë se Pogba u rikthye tek Juventus në verën e vitit të kaluar, duke nënshkruar një kontratë të re për 4 vitet e ardhshme. Në atë kohë, lojtari ishte një agjent i lirë, pasi kontrata e tij me Manchester United skadoi, dhe palët vendosën të mos rinovojnë. Megjithatë, aventura e re e Pogba tek “zonja e vjetër” ka rezultuar mjaft e vështirë.
Problemet me dëmtimet e kanë lënë francezin jashtë fushave të blerta për pjesën më të madhe të kohës së tij në Torino. Ndërkohë kujtojmë se Pogba gjithashtu humbi botërorin e Katarit për shkak të një dëmtimi. Sezonin e kaluar mesfushori u aktivizua për vetëm 162 minuta me Juventus.
Ndërkohë përsa i përket pezullimit për shkak të dopingut, francezi ka 3 ditë kohë për të dërguar pranë autoriteteve italiane një analizë që mund të vërtetojë pafajësinë e tij.
