Eleminimi shokues nga Maroku në Kupën e Botës duket se i ka kushtuar Luis Enrique vendin e trajnerit tek kombëtarja spanjolle. Federata Spanjolle e Futbollit bëri të ditur lajmin e dorëheqjes së teknikut në një deklaratë zyrtare, duke falenderuar Enrique dhe stafin e tij për kontributin. Ish-trajneri i Barcelonës u vendos në krye të Spanjës në vitin 2018.
Ndërkohë, ende nuk ka një ide të qartë se cili do të jetë pasuesi i tij në krye të pankinës tek “Furia e Kuqe”. Mediat spanjolle bëjnë me dije se trajneri i kombëtares U21, Luis de la Fuente është emri kryesor që përflitet për të zëvëndësuar Enrique. Megjithatë, emërimi i tij duhet të aprovohet nga bordi, i cili do të mblidhet ditën e hënë.
Spanja u eleminua nga Maroku pas goditjes së penalltive në fazën e 1/16-ave. Ekipi startoi botërorin me një fitore spektakolare 7-0 ndaj Kosta Rikës, por stili i lojës me shumë pasime dhe mbajtje të gjatë të topit u konsiderua shpesh herë “i mërzitshëm” nga shumë ekipe. Problematikat e kësaj loje u panë qartë në humbjen ndaj Japonisë si dhe barazimin 1-1 ndaj Gjermanisë.
“Furia e Kuqe” nuk ka fituar asnjë trofe madhor që prej vitit 2012, kur u shpallën kampionë Europe. Për më shumë, Spanja nuk ka fituar asnjë ndeshje me eleminim direkt në botëror, që prej vitit 2010, kur përfaqësuesja u shpall kampione bote.
Sipas analistit sportiv Guillem Balague, kombëtares spanjolle i mungonin disa elementë kyç përgjatë aventurës së tyre në Katar. Lojtarët nuk ishin fizikisht të fortë, loja e tyre nuk ishte e shpejtë sa duhet, krosimet në zonë ishin të pakëta, si dhe goditjet e dënimit linin për të dëshiruar. Duke thënë këto, Spanjën e pret tashmë një rrugë e gjatë drejt rigjetjes së identitetit në lojën e vet.
