Franca mposhti Poloninë me rezultatin 3-1, duke mos vënë asnjëherë në diskutim çështjen e kualifikimit. Ishte Olivier Giroud ai që zhbllokoi rezlutatin e sfidës në minutën e 44’, duke u bërë zyrtarisht golashënuesi me më shumë gola në historinë e kombëtares franceze. Giroud kontrolloi mjaft mirë pasimin e Mbappe, duke mposhtur Wojciech Szczesny me një goditje rrafsh me tokën.
Por pasi asistoi Giroud, ishte rradha e Mbappe që të gjente rrugën e rrjetës. Sulmuesi, që zhvilloi një paraqitje individuale sensacionale, fillimisht shënoi golin e parë në minutën e 74’ të sfidës, me një goditje të fortë dhe preçize nga rreth 16 metra distancë nga porta. Më pas, në minutat shtesë të ndeshjes Mbappe gjeti përsëri golin, me një tjetër goditje mjaft të bukur me të djathtën.
Në minutën e 9’ të shtesës arbitri akordoi një penallti për Poloninë, dhe Robert Lewandowski u tregua i saktë nga pika e bardhë, duke shënuar golin e ngushëllimit për kombëtaren e tij. Pavarësisht paraqitjes mjaft të mirë, Franca rezultoi një kundërshtar tejet i fortë për polakët.
Ndërkohë nga ana tjetër, Anglia gjithashtu fitoi në mënyrë bindëse ndaj Senegalit në shifrat 3-0. Rezultati do të thotë se të besuarit e trajnerit Southgate do të përballen me Francën në çerekfinalet e këtij botërori.
“3 Luanët” u vunë në vështirësi në fillim të takimit, teksa portieri Pickford shpëtoi ndali në mënyrë spektakolare goditjen e Boulaye Dia, e cila nëse do të përfundonte në portë, mund të ndryshonte rrjedhën e ndeshjes.
Gjithsesi, anglezët nuk e vunë asnjëherë në dyshim superioritetin e tyre dhe eventualisht gjetën rrugën e rrjetës me Henderson në minutën e 38’ të sfidës. Kane dyfishoi rezultatin vetëm pak para mbylljes së pjesës së parë, duke shënuar golin e tij të parë në këtë botëror.
Në pjesën e dytë do të kishte hapësirë dhe për talentin e Arsenal, Saka, i cili në minutën e 57’ vulosi shifrat përfundimtare 3-0. Tashmë trajneri Southgate duhet të mendojë për sfidën ndaj Francës, kampionëve në fuqi të Kupës së Botës.
