Pas lajmit se Xabi Alonso do të qëndrojë dhe për 1 sezon tjetër tek Bayer Leverkusen, drejtuesit e Liverpool po konsiderojnë alternativa të tjera për zëvëndësuesin e Jurgen Klopp në krye të pankinës së klubit. Tashmë, mediat angleze kanë raportuar se Ruben Amorim i Sporting Lisbon është emri që kryeson garën për të marrë drejtimin e “The Reds”.
Suksesi i teknikut në Portugali, si dhe stili i lojës që Amorim ka aplikuar tek Sporting Lisbon kanë tërhequr vëmendjen e shumë klubeve në Europë, teksa përvec Liverpool, Bayern Munich dhe Barcelona gjithashtu mendohet se po mbajnë Ruben në monitorim. Kjo do të thotë se drejtuesit e Liverpool nuk duhet të humbasin kohë nëse vërtet duan që Amorim të jetë në krye të pankinës së Anfield sezonin e ardhshëm.
Ndërkohë, një tjetër opsion që po merret parasysh është dhe trajneri i Brighton, Roberto De Zerbi. Italiani ka impresionuar me atë që ka arritur të krijojë nën drejtimin e “pulëbardhave” dhe shumë janë të besimit se tekniku është gati të hedhë hapin e rradhës në karrierën e tij, duke marrë drejtimin e një klubi elitar. Një tjetër avantazh i De Zerbi krahasuar me Ruben Amorim është eksperienca e tij në Premier League. Gjithsesi, drejtuesit e Liverpool do të marrin më shumë kohë përpara se të vijnë me një vendim, mbi trajnerin e ardhshëm të klubit.
Ndërkohë përsa i përket Xabi Alonso, tekniku spanjoll do të jetë të paktën dhe për 1 sezon tjetër në krye të Bayer Leverkusen. Spanjolli u shpreh se ndihet mjaft mirë në Gjermani, dhe se kërkon të vazhdojë punën e tij në krye të klubit. Leverkusen gjendet tashmë 13 pikë para Bayern Munich në renditjen e përgjithshme të Bundesliga. Ekipi i Xabi po ecën me hapa të sigurtë drejt titullit kampion.
