Jurgen Klopp nuk do të jetë më trajneri i Liverpool sezonin e ardhshëm. Lajmi është bërë i ditur nga vet klubi, që ka postuar në rrjetet sociale një intervistë me Klopp, ku gjermani ka bërë të ditur arsyet e vendimit të tij. Tekniku u shpreh se nuk ka më energjitë e duhura për të vijuar punën në krye të Liverpool, të cilën e ka cilësuar mjaft të vështirë. Kujtojmë se Klopp u vendos në krye të Liverpool në vitin 2015, ndërkohë që kontrata e tij pritetj të skadonte në vitin 2026.
Trajneri gjerman u shpreh:
“E informova klubin që në nëntor. E kuptoj se vendimi është një shok për shumë njerëz në këtë moment, kur e dëgjon për herë të parë, por mund ta shpjegoj, ose të paktën të mundohem ta shpjegoj. E dua absolutisht cdo gjë për këtë klub, për qytetin, tifozët tanë, skuadrën, stafin… Por përsëri kam marrë këtë vendim dhe kjo tregon se jam i bindur se është vendimi i duhur për t’u marrë.”
Klopp shtoi:
“Për momentin jam duke më shteruar energjitë. Tani nuk kam problem, e dija se do vinte pika që do të duhej ta bëja të ditur, por për momentin jam mirë. Por, e di se nuk mund ta bëj këtë punë përsëri dhe përsëri.”
Tekniku gjerman u pyet nëse do të vazhdojë punën e trajnerit në të ardhmen, dhe pavarësisht nevojës për pushim, Klopp tha se nuk e di si do të ndihet pas pauzës. Megjithatë, Jurgen u kujdes të theksojë se asnjëherë nuk do të drejtojë më një klub anglez, përvec Liverpool në të ardhmen. Kjo ngriti dhe pikëpyetjet e një rikthimi të mundshëm në Anfield në të ardhmen, si ai i Alex Ferguson tek Manchester United. Megjithatë, Klopp e ka përjashtuar dhe këtë mundësi.