Liverpool ka piketuar Leroy Sane, si objektivin kryesor të rradhës në merkaton e ardhshme. Drejtuesit e klubit anglez janë të besimit se lojtari i Bayern do të jetë zëvëndësuesi perfekt i Salah, në rast se ky i fundit vendos të largohet nga Anfield. Sane ndërkohë ka marrë dhe vëmendjen e Real Madrid, por trajneri i Liverpool, Jurgen Klopp, është mjaft i vendosur për të sjellë sulmuesin në Anfield.
Sane ka startuar mjaft mirë sezonin e ri në Bundesliga me Bayern, duke realizuar 7 gola në 11 ndeshje. Lojtari u bë pjesë e klubit gjerman në vitin 2020, kur u transferua nga Manchester City për shifrën e 55 milionë paundëve. Tani kuptohet se Bayern do të kërkojë më shumë për kartonin e sulmuesit, por kjo nuk pritet të përbëjë problem për Liverpool.
Merkaton e kaluar, anglezët refuzuan një ofertë prej 150 milionë paundësh nga Arabia, për kartonin e Salah. Kjo do të thotë se për egjiptianin mund të vijnë dhe oferta të tjera, akoma më të mëdha. Këto para mund të përdoren më pas për të sjellë Sane në Anfield. Trajneri Klopp e di mjaft mirë se Salah mund të largohet drejt Arabisë Saudite verën e ardhshme, dhe kjo është arsyeja se përse Liverpool ka piketuar Sane si zëvëndësuesin e tij, që në këto momente.
Drejtuesi i futbollit në kampionatin e Arabisë Saudite, Michael Emenalo, ka shprehur simpatinë e tij për Salah:
“Mo është i mirëpritur në çdo moment. Ai është lojtari im i preferuar. Ka shumë lojtarë të klasit botëror që kanë shprehur interes (për ligën arabe). Arabia është një vend ku mund të argëtohesh dhe padyshim të përmirësosh aspektin ekonomik.”
Salah duket në super formë, edhe pas disa vitesh mjaft intensive në Premier League me Liverpool, një tregues i qartë ky i disiplinës dhe seriozitetit të “faraonit”.