Mbrojtësi i Liverpool, Virgil van Dijk do të jetë jashtë fushave të blerta për të paktën 1 muaj. Shkak është bërë një dëmtim muskular dhe lajmi është bërë i ditur nga vet trajneri Jurgen Klopp. Van Dijk u zëvëndësua në pushimin mes pjesëve, gjatë sfidës së Liverpool me Brentford. “The Reds” u mposhtën 3-1 nga kundërshtarët.
Në prag të përballjes me Wolves e vlefshme për FA Cup, trajneri Klopp komentoi dëmtimin e mbrojtësit hollandez:
“Ishte një surprizë dhe një goditje e madhe për ne. Diagnoza ishte serioze. Po flasim për javë, më shumë se 1 muaj. Bëhet fjalë për një problem muskular, asgjë tjetër, në momentin që ndodhi Van Dijk do të ketë sprintuar më shumë se duhet. Për Virgil është e vështirë por ai ka luajtur një numër shumë të madh ndeshjesh përgjatë viteve të fundit, dhe tani nuk mund ta përdorim atë në fushë, vetëm jashtë saj, dhe atë do të bëjmë. Ai nuk ka patur asnjëherë probleme me muskujt, por ndodhi tani. Nuk kemi bërë asgjë ndryshe.”
Tekniku gjerman gjithashtu komentoi mbi gjendjen e Henderson, duke dhënë një lajm të mirë për tifozët e Liverpool:
“Ditën e djeshme ai i bëri të gjitha ato që duhej të bënte në stërvitje. Nga sot mund të them se ai është i disponueshëm të stërvitet dhe të bëjë gjithçka.”
Henderson vuajti një goditje në kokë në sfidën ndaj Brentford. Ndërkohë në lidhje me mungesën e Van Dijk, Klopp duhet të mendojë tashmë për zëvëndësuesin e duhur në qendër të mbrojtjes. Trajneri ka mjaftueshëm mundësi zgjedhjesh, teksa Joel Matip, Ibrahima Konate, Joe Gomez dhe Nathaniel Phillips aktivizohen të gjithë në atë pozicion. Megjithatë, përshtatja e tyre me pjesën tjetër të ekipit është një sfidë që mund të rezervojë surpriza, sidomos në këtë pikë mjaft delikate të sezonit.