Për shkak të agresionit të rëndë që Rusia ka ndërmarrë ndaj Ukrainës, kombëtarja polake e futbollit ka vendosur të bojkotojë ndeshjen e playoff-it të Botërorit kundër përfaqësueses ruse. Presidenti i federatës polake të futbollit, Cezary Kulesza, tha se ekipi përfaqësues nuk ka ndërmend ta zhvillojë takimin.
Ylli i Bayern Munich dhe Polonisë, Robert Lewandowski, mbështeti fort vendimin e shokëve të tij, teksa dha një mesazh të fortë drejtuar publikut. Ai tha:
“Ky është vendimi i duhur. Nuk mund ta imagjinoj të luaj një ndeshje me kombëtaren ruse teksa agresioni ndaj Ukrainës vazhdon. Lojtarët dhe fansat rusë nuk janë përgjegjës për këtë, por ne nuk mund të shtiremi sikur nuk po ndodh asgjë.”
Ndërkohë nga ana tjetër, ish-kampioni i botës në peshat e rënda në boks, Wladimir Klitschko, i bëri apel qytetarëve në Kiev që të ndihmojë të gjithë për t’i bërë ballë agresionit rus. Klitschko tha:
“Po i drejtohem të gjithë botës që të ndalojë luftën që Rusia ka nisur. Nuk ka kohë për të pritur sepse do të kthehet në një katastrofë humanitare. Duhet të veprojmë tani. Nesër do të jetë shumë vonë. Ju lutem ndërhyni tani, jepini fund kësaj lufte.”
Vëllai i Wladimir, Vitali Klitschko, është kryetar i bashkisë së Kievit. Edhe ai është përfshirë në mënyrë aktive në rezistencën e ukrainasve ndaj sulmit rus.
UEFA ndërkohë po shikon mundësinë për të ndërprerë marrëdhënien e saj me gjigandin rus Gazprom. Kompania është një nga sponsorat më të mëdhenj të organit të futbollit, me një kontratë prej 30 milionë paundësh në vit, por rrethanat në të cilat ndodhet Ukraina i tejkalojnë interesat ekonomike.
Përveç UEFAs, në lidhje me situatën e krijuar kanë reaguar dhe shumë autoritete të tjera sportive. Së fundmi, Formula 1 vendosi të anullojë çmimin e madh të Sochit në Rusi.