Jeremie Frimpong është nën shënjestrën e dy klubeve rivale të Manchester-it. City dhe United janë duke monitoruar yllin e Bayer Leverkusen, i cili ka impresionuar me paraqitjet e tij këtë sezon, dhe sipas të gjitha gjasave do të ngrejë lart trofeun e Bundesliga për disa javë. Frimpong ka një klauzolë për prishjen e kontratës në vlerë 35 milionë paundë, ndërkohë që marrëveshja aktuale e lojtarit me klubin gjerman është e vlefshme deri në vitin 2028. Vlera e ofruar për kartonin e tij pritet të jetë shumë më e lartë se ajo e parashikuar në klauzolë, duke marrë parasysh luftën financiare që klubet do të përfshihen për të siguruar Frimpong.
Përfaqësues të Manchester United kanë qënë prezent në Gjermani për të ndjekur nga afër performancat e Frimpong. Manchester City ndërkohë e sheh mbrojtësin si zëvëndësuesin afatgjatë të Kyle Walker. Lojtari mund të luajë nga të dyja krahët dhe do të ishte një alternativë perfekte në ekipin e Pep Guardiola. Sidomos duke marrë parasysh faktin se hollandezi është aktivizuar me sukses dhe në mesfushë.
Frimpong u aktivizua 2 sezone me Celtic, përpara se të transferohej në Bundesliga, tek Bayer Leverkusen. Lojtari ka dhe tipare të mira në repartin ofensiv, teksa ka shënuar gola të rëndësishëm për ekipin e tij këtë sezon.
City për momentin ka avantazhin mbi rivalët e United për të siguruar shërbimet e Frimpong, duke marrë parasysh nivelin e klubit, si dhe faktin se City mund t’i ofrojë mbrojtësit futboll në Champions League. Manchester United nga ana tjetër duhet të luftojë me Tottenham dhe Aston Villa për të siguruar një vend në 4 më të mirët e Premier League. Megjithatë, të besuarit e trajnerit Ten Hag ndodhen 11 pikë larg Aston Villa, pas një barazimi zhgënjyes ndaj Brentford me rezultatin 1-1 në sfidën e fundit.
