Drejtuesit e Manchester City janë të gatshëm t’i ofrojnë Rodri një paketë të re financiare, që do të përkthehet në një rritje të madhe rroge për mesfushorin spanjoll. Trajneri Pep Guardiola është i mendimit se Rodri është kthyer në lojtarin e tij më të rëndësishëm në vitin e fundit, dhe City është gati të shpërblejë mesfushorin për paraqitjet e tij fantastike në fushën e blertë.
Rodri fiton momentalisht rreth 180 mijë paundë në javë tek Manchester City dhe ka ende rreth 3 vite kontratë aktive me klubin e tij, pas marrëveshjesh që firmosi në vitin 2022. Megjithatë, drejtuesit e City nuk duan të presin që lojtari t’i afrohet përfundimit të kontratës për t’i ofruar atij një marrëveshje të re. Mediat angleze kanë bërë të ditur se Rodri pritet t’i ofrohet një marrëveshje e re, sipas të cilës lojtari do të përfitojë rreth 300 mijë paundë në javë, një rritje mjaft e madhe krahasuar me pagën e tij aktuale.
Përvec aftësive të tij mbresëlënëse në rolin e mesfushorit difensiv, Rodri ka veshur disa herë dhe shiritin e kapitenit tek “qytetarët”, dhe pritet të jetë kapiteni i rregullt i Manchester City, në momentin që Kyle Walker dhe Kevin De Bruyne do të largohen nga klubi. Ishte pikërisht Rodri ai që shënoi golin e vetëm në finalen e Champions League sezonin e kaluar, duke i dhuruar Manchester City titullin e shumëkërkuar prej kohësh. Tashmë, “qytetarët” do të përballen përsëri me Real Madrid, në rrugën e tyre për të mbrojtur titullin e kampionit të Europës.
Rodri ndërkohë është kthyer në një lojtar të rëndësishëm jo vetëm për City, por dhe për kombëtaren spanjolle. Mesfushori e ka siguruar tashmë vendin e titullarit me Spanjën dhe pritet të luajë rol kryesor në Euro 2024, në skuadrën e Luis de la Fuente.