Trajneri i Manchester City, Pep Guardiola, ka dhënë detaje mbi gjendjen e Erling Haaland, pas dëmtimit të lehtë që ky i fundit mori në sfidën ndaj Borussia Dortmund në Champions League. Norvegjezi u zëvëndësua në pushimin mes pjesëve për shkak të një goditje që mori në këmbë. Megjithatë, Guardiola ka konfirmuar dhe një herë se nuk bëhet fjalë për një problem serioz. Spanjolli komentoi për mediat në prag të sfidës së City ndaj Sevilla:
“Erling nuk do të jetë i disponueshëm për nesër. Ai ndihet më mire krahasuar me të shtunën dhe të dielën, por ende jo në 100%. Nuk duam të marrim një risk, nuk bën sens. Shpresojmë se ai do të jetë i gatshëm për sfidën ndaj Fulham.”
Haaland nuk ishte i disponueshëm në sfidën ndaj Leicester, por gjithsesi, “qytetarët” ia dolën të siguronin një fitore minimale falë golit të De Bruyne. Sulmuesi norvegjez ka shënuar plot 22 gola në 15 takimet e tij të para me Manchester City, një rekord i jashtëzakonshëm. Të besuarit e Pep Guardiolës do të përballen me Sevilla në shtëpi, në sfidën e fundit të fazes në grupe të Champions League.
Anglezët e kanë siguruar tashmë vendin e parë në grup, dhe përveç Haaland, Guardiola pritet të lërë pushim dhe disa prej titullarëve të tjerë. City do të luajë përballë Fulham ditën e shtunë në kampionat, në një sfidë mjaft të rëndësishme. “Qytetarët” nuk mund t’i falin vetes një hap fals, në qoftë se kërkojnë të mos humbasin ritmin e Arsenal, që kryson momentalisht Premier League-ën me 31 pikë, 2 më pak se City.
Guardiola ndërkohë ka zbuluar planet e tij dhe për Kupën e Botës, teksa ka thënë se planifikon të pushojë gjatë Botërorit të Katarit, dhe të ndjekë ndeshjet nga shtëpia. Lojtarët e City të cilët nuk do të marrin pjesë në Botëror pritet të udhëtojnë drejt Abu Dhabit për një periudhë stërvitore në mot të ngrohtë.
