Manchester City ka gjetur akordin me francezët e Rennes, për transferimin e sulmuesit belg Jeremy Doku në Etihad. Anësori i talentuar ka shënuar 12 gola në 92 paraqitje me ekipin e Ligue 1, dhe ka impresionuar me paraqitjet e tij, sidomos gjatë sezonit të fundit. Doku do të jetë kështu blerja e tretë madhore për “qytetarët” në këtë merkato vere.
Kujtojmë se City gjithashtu afroi në ekip Mateo Kovacic nga Chelsea, si dhe kroatin Josko Gvardiol nga RB Leipzig në Gjermani. Transferimi i Doku pritet t’u kushtojë Manchester City 55.4 milionë paundë. Lojtari është tashmë në Angli, ku pritet t’i nënshtrohet kontrolleve mjekësore, përpara se transferimi të finalizohet.
Chelsea, Tottenham dhe West Ham gjithashtu shprehën interes për lojtarin, por mesa duket City ia doli të mposhtë konkurrencën. Doku do të duhet të luftojë për vendin e titullarit, në një ekip me lojtarë mjaft të talentuar, jo vetëm në pozicionin e tij. Megjithatë, dëmtimi i Kevin de Bruyne është faktor që mund të krijojë më shumë hapësira për lojtarët jo-titullarë në skuadrën e Guardiolës.
Largimet gjithashtu nuk kanë munguar nga City, teksa Riyad Mahrez dhe Ilkay Gundogan i kanë dhënë fund aventurës së tyre në Etihad. Në të njejtën kohë, “qytetarët” kanë pranuar një ofertë nga Al-Nassr për mbrojtësin spanjoll Laporte. Joao Cancelo gjithashtu pritet të largohet, teksa portugezi është afër transferimit tek Barcelona në formë huazimi.
Ndërkohë, në kampin e Manchester City, trajneri Pep Guardiola pritet të humbasë dy ndeshjet e ardhshme të skuadrës së tij, për arsye shëndetësore. Spanjolli ka kryer një operim të lehtë, për shkak të dhimbjeve të vazhdueshme të shtyllës kurrizore. Mësohet se Pep ka udhëtuar në Barcelonë për të kryer ndërhyrjen dhe operacioni ka kaluar pa probleme. Guardiola do të humbasë sfidat e City ndaj Sheffield United në transfertë, dhe Fulham në shtëpi.
