Sipas burimeve të prestigjozes Mirror, drejtuesit e Manchester City kanë fituar siguri se trajneri Pep Guardiola do të rinovojë kontratën e tij me “qytetarët”. Mediat angleze bëjnë me dije se tekniku do të firmosë një marrëveshje të re me City, edhe nëse anglezët fitojnë Champions League, që ka qënë prej kohësh synimi kryesor i drejtuesëve të klubit, por dhe vet Guardiolës.
Ky i fundit ka dhe 1 vit të mbetur në kontratën e tij aktuale në Etihad, por bisedimet mes spanjollit dhe klubit për rinovimin tashmë kanë nisur. Për këtë po kujdeset vëllai dhe njëkohësisht agjenti i Guardiolës, Pere. Nga ajo që dihet deri më tani, drejtuesit e klubit anglez kanë dëshirë që Pep të jetë pjesë e City të paktën deri në vitin 2025.
Deri më tani, në media është përfolur gjithmonë se Guardiola do të largohet nga Etihad në momentin që triumfon në Champions League. Kjo ide bën sens duke marrë parasysh se Manchester City ka qënë tejet dominant në kampionat nën drejtimin e Guardiolës, duke fituar të gjitha trofetë e mundshme. Por mesa duket spanjolli beson se skuadra që ai drejton ende nuk ka arritur potencialin e saj maksimal.
City është duke diskutuar termat përfundimtar të marrëveshjes me Erling Haaland, një nga sulmuesit më të talentuar në Europë për momentin. Kjo mund të ngrejë në një tjetër nivel lojën e “qytetarëve”, të cilët pavarësisht se janë perfekt në aspektin taktik, u mungon një sulmues i mirëfilltë, që prej largimit të Sergio Aguero.
Verën e kaluar City dështoi të sillte në Etihad talentin e Tottenham, Harry Kane, pavarësisht insistimit dhe ofertave stratosferike. Kjo zhgënjeu shumë Pep, i cili mesa duket ka marrë garancinë nga drejtuesit e klubit se kësaj rradhe, një sulmues elitar do të bëhet pjesë e ekipit sezonin e ardhshëm. Kjo mund të jetë dhe arsyeja që ish-trajneri i Barcelonës është shumë afër rinovimit me kampionët në fuqi të Anglisë.
