Tekniku spanjoll i Manchester City, Pep Guardiola, ka thënë se aventura e tij tek “qytetarët” nuk mund të konsiderohet e kompletuar nëse City nuk fiton Champions League-ën. Ekipi anglez ka kaluar një periudhë mjaft të suksesshme nën drejtimin e Pep, por ende nuk ka arritur të triumfojë në kompeticionin prestigjoz.
Të besuarit e Guardiolës iu afruan vërtet shumë objektivit në finalen e vitit 2021, por u mposhtën nga Chelsea i Tuchel në sfidën e fundit. Ndërkohë, trajneri spanjoll ka rinovuar kontratën e tij me klubin deri në vitin 2025, duke shprehur dhe një herë tjetër se objekti kryesor mbetet i njejti. Guardiola komentoi së fundmi për mediat:
“Nuk është i vetmi trofe (Champions League) por e pranoj se duam dhe koha ime këtu nuk do të ishte e kompletuar nëse nuk do ta fitonim. Do të bëj gjithçka kam në dorë gjatë kohës që jam këtu. Bëhet fjalë për trofeun që nuk e kemi dhe do të përpiqemi t’ia dalim. Mendoj se herët apo vonë do ta fitojmë…”
City do të përballet në Champions me gjermanët e RB Leipzig, në një sfidë delikate, pavarësisht se “qyteatarët” do të zbresin në fushë si favoritë. Ekipit të Guardiolës i janë bashkuar ndërkohë dhe shumica e lojtarëve që u aktivizuan në Kupën e Botës. Pep u shpreh i lumtur për rikthimin e futbollistëve:
“Jemi të lumtur që janë rikthyer. Kam ndjesinë se lojtarët që ishin në botëror janë në një formë më të mirë sesa ata që munguan, sepse atyre që nuk shkuan u mungon ritmi.”
Tekniku spanjoll gjithashtu përgëzoi Julian Alvarez për triumfin me Argjentinën në Katar, ndërkohë që nuk harroi të përgëzonte dhe Messin, marrë shkas nga historia e tyre e suksesit tek Barcelona. Sipas Guardiolës, triumfi i Argjentinës në Kupën e Botës ishte i merituar.
