Arabët e Al Nassr po bëjnë gati një ofertë mjaft të mirë financiare për Casemiro dhe Aaron Wan-Bissaka. Manchester United është gati të heqë dorë prej disa nga lojtarëve aktualë, duke u nisur dhe nga nevojat financiare të klubit. Drejtori sportiv i klubit anglez, John Murtough, mësohet se ka fluturuar drejt Arabisë Saudite për të diskutuar marrëveshje potenciale për disa prej lojtarëve të United.
Casemiro është një prej emrave që drejtuesit e klubit anglez duan të largojnë këtë merkato, ose në fund të sezonit. Braziliani paguhet plot 375 mijë paundë në javë, por nuk ka luajtur që prej muajit nëntor për shkak të një dëmtimi. Kujtojmë se “Djajtë e Kuq” paguan plot 70 milionë paundë për të sjellë lojtarin nga Real Madrid vitin e kaluar, dhe tashmë bordi i United kërkon të përfitojë sa më shumë të jetë e mundur nga shitja e tij.
Sipas mediave angleze, Al Nassr mësohet se i ka ofruar Casemiro një kontratë mjaft të mirë, ndërkohë që braziliani ka marrë dhe inkurajimin e ish shokut të tij të skuadrës tek Real Madrid, Cristiano Ronaldo.
Ndërkohë, klubi saudit gjithashtu është i interesuar për Wan-Bissaka. Al Nassar fillimisht ofroi 20 milionë euro për shërbimet e Emerson Royal të Tottenham, por pas refuzimit nga ana e klubit londinez, duket se klubi arab ka zhvendosur vëmendjen tek alterantivat, ku një prej tyre është dhe lojtari i United.
E ardhmja e Wan-Bissaka në Old Trafford është në udhëkryq, teksa drejtuesit e klubit ende nuk i kanë ofruar lojtarit një kontratë të re. West Ham dhe Crystal Palace gjithashtu janë të interesuara për shërbimet e mbrojtësit, por sipas të gjitha gjasave, nëse Al Nassr futet në lojë, oferta e klubit arab do të jetë superiore. Mbetet të shohim nëse Casemiro apo Wan-Bissaka do të largohen gjatë merkatos së këtij muaji.
