Manchester United është i interesuar në shërbimet e mesfushorit francez të Chelsea, N’Golo Kanté. Kontrata e këtij të fundit me londinezët skadon vitin e ardhshëm, dhe kjo ka bërë që drejtuesit e United të mendojnë për një ofertë të mundshme. “Djajtë e Kuq” janë të dëshpëruar për të përforcuar mesfushën e tyre, teksa ky repart ishte një nga më problematikët në sezonin e që lamë pas.
Për momentin Chelsea nuk është ende i gatshëm të heqë dorë nga Kanté. Lojtari mbetet një nga shtyllat e formacionit bazë të Tuchel, dhe tekniku gjerman i beson mjaft fortë aftësive të mesfushorit. Megjithatë, së fundmi ka patur disa shqetësime mbi dëmtimet e këtij sezoni, por kjo nuk i heq aspak meritat Kanté, i cili kur është në 100% e tij mbetet padyshim një nga mesfushorët më të mirë në Premier League.
Thomas Tuchel nuk e ka fshehur asnjëherë dëshirën e tij për të vazhduar punën me Kanté në ekip. Por megjithatë, në një intervistë të fundit, gjermani shprehu hapur frutstrimin e tij me dëmtimet e lojtarit. Tekniku i Chelsea tha:
“Mendoj se ai (Kanté) është lojtari jonë kyç. Por një lojtar kyç duhet të jetë në fushën e blertë. Ai luan vetëm 40% të ndeshjeve. Kështu që mbase është një mrekulli që e mbyllëm sezonin në vendin e tretë. Ai është lojtari që bën diferencën për ne dhe në qoftë se e ke të disponueshëm në vetëm 40% të ndeshjeve, ky është një problem i madh.”
Duke marrë parasysh kontratën aktuale të Kanté, Chelsea duhet të ndërmarrë një vendim. Në të kundërt, londinezët rrezikojnë të humbasin me kosto zero sezonin e ardhshëm, një nga lojtarët e tyre më të mirë. Megjithatë, për momentin është Jorginho mesfushori që ka më shumë gjasa për t’u larguar nga Stamford Bridge.
