E ardhmja e David de Gea tek Manchester United është në dyshim. Portieri spanjoll është pranë nënshkrimit të një kontrate të re, por gabimet e pafalshme në ndeshjet e fundit me “Djajtë e Kuq”, kanë bërë që statusi i tij në Old Trafford të lëkundet.
Mediat në Angli raportojnë se De Gea nuk do ta ketë të sigurtë rolin e titullarit në sezonin e ardhshëm, edhe nëse firmos një kontratë të re. Trajneri Erik ten Hag duket se ka humbur disi besimin tek spanjolli në javët e fundit. De Gea i dhuroi West Ham fitoren në kampionat, pas një pritje të gabuar të gjuajtjes së Said Benrahma. Sfida u mbyll me rezultatin 1-0. Edhe në ndeshjen ndaj Sevilla në Europa League, De Gea dha një pasë të gabuar drejt Maguire, e cila u interceptua nga spanjollët dhe United u ndëshkua, duke u eleminuar eventualisht nga kompeticioni.
Pavarësisht gabimeve të portierit, drejtuesit e United janë ende në bisedime me De Gea për një rinovim kontrate, dhe sipas të gjitha gjasave, spanjolli duhet të pranojë një ulje page për të arritur në një marrëveshje. Momentalisht De Gea fiton rreth 375 mijë paundë në javë, një shifër mjaft e lartë, edhe për një portier të kalibrit të tij.
Drejtuesit e klubit kërkojnë që De Gea të firmosë një kontratë të re, me një pagë më të ulët dhe bonuse bazuar në performancë. Kjo është dhe arsyeja se përse bordi i United nuk ka vendosur të aktiviozjë klauzolën për rinovim për një vit ekstra, që është e parashikuar në kontratën ekzistuese të gjigandit të portës.
Klubi është gjithashtu në kërkim të alternativave të reja për portën, dhe një prej tyre është portieri i Brentford, David Raya. Një tjetër opsion është dhe Diogo Costa i Porto, por ende nuk ka tentativa konkrete nga ana e Manchester për të bërë oferta zyrtare për këto emra.