Manchester United e nisi me një fitore spektakolare këtë sezon të ri të Premier League. Djemtë e Ole Solskjaer triumfuan me rezultatin 5-1 përballë Leeds në shtëpi. Megjithëse çmimi i lojtarit të ndeshjes shkoi për Bruno Fernandes, pas tripletës që realizoi, ishte francezi Paul Pogba që vërtet shkëlqeu me paraqitjen e tij.
Kontributi me 4 asiste i mesfushorit ishte pikërisht ajo çka fansat e United donin të shihnin prej Pogba. Megjithatë, shoku i tij i skuadrës Bruno Fernandes nuk është aspak i habitur nga paraqitja e mesfushorit. Portugezi deklaroi pas fitores:
“Njerëzit flasin shumë për aftësitë e Paul, por ato janë të padiskutueshme. Ne e dimë se çfarë është në gjendje të bëjë. Paul është një lojtar i rëndësishëm për ne dhe i presim këto lloj performancash prej tij.”
Por, pavarësisht fjalëve të Fernandes, forma e Pogba përgjatë sezoneve të fundit ka ngritur vazhdimisht pikëpyetje, kjo gjë vërtetohet dhe nga statistikat. Trajneri i United duket se është lodhur nga diskutimet që zhvillohen vazhdimisht rreth francezit, dhe në intervistën pas ndeshjes, u fokusua më shumë tek performanca e përgjithshme e ekipit. Megjithatë, komentet për mesfushorin nuk mund të mungonin:
“Paul ka vizionin dhe aftësitë e duhura. Jam gjithashtu mjaft i impresionuar me nivelet e përgatitjes së tij fizike. Duket në formë mjaft të mirë”
Performanca fantastike e francezit erdhi në një moment delikat ku zërat për largimin e tij po bëheshin gjithnjë e më të fortë mes fansave të United. Në këto rrethana ishte PSG që përveç interesit, kishte dhe garancinë financiare për të afruar mesfushorin. Por, afrimi i papritur i Leo Messit në Paris duket se i prishi planet. Mesa duket, për fat të mirë të anglezëve.
Ndër të tjera, Solskjaer nënvizoi rëndësinë e rikthimit të fansave në Old Trafford:
“18 muajt e fundit kanë qenë të çuditshëm. Komunikimet me fansat kanë qenë vetëm nëpërmjet mediave dhe televizorit, prandaj ribashkimi me ta është i një rëndësie të veçantë. Ky është Manchester United-i i vërtetë.”
