Sir Jim Ratcliffe besohet se shumë shpejt do të zotërojë zyrtarisht 25% të aksioneve të Manchester United. Lajmi i cili është përfolur prej kohësh do të njoftohet javën e ardhshme nga klubi, dhe kjo do të thotë se tashmë Jim Ratcliffe do të ketë kontroll mbi merkaton e United. Por cilat janë planet e biznesmenit anglez për emrat që pritet të largohen nga Old Trafford? Burime të afërta pranë tij kanë hedhur dritë për disa prej tyre.
Anthony Martial nuk është më në planet e Ratcliffe, teksa francezi ka shënuar vetëm 89 gola në plot 9 sezone tashmë me klubin. Drejtuesit e United u munduan të shisnin kartonin e tij gjatë merkatos së verës, por tentativat e drejtuesëve të klubit dështuan. Gjithesesi, largimi i Martial në merkaton e janarit duket tashmë i sigurt, dhe kjo jo vetëm për shkak të planit të Ratcliffe. Sulmuesit i skadon kontrata në fund të sezonit dhe United nuk mund ta lërë atë të largohet me kosto zero nga klubi.
Antony gjithashtu është në listën e lojtarëve që Jim Ratcliffe dëshiron të largojë nga Old Trafford. Braziliani bëri mjaft bujë kur erdhi në Angli nga hollandezët e Ajax për shifrën stratosferike prej 85.5 milionë paundësh. Megjithatë, performancat e tij kanë lënë për të dëshiruar në fushën e blertë. Ndërkohë, problemet jashtë fushe janë një tjetër arsye se përse Antony mund të largohet nga “Djajtë e Kuq”.
Jadon Sancho gjithashtu pritet të largohet me siguri nga Old Trafford. Ky i fundit është ende i përjashtuar nga ekipi i parë pas përplasjeve me trajnerin Ten Hag dhe nuk ka më të ardhme tek Manchester United.
Ndërkohë, fakt interesant është se Donny van de Beek nuk pritet të largohet, pavarësisht se ka luajtur vetëm 35 ndeshje gjithsej në Premier League në 3 vite e gjysmë me klubin. Lojtari e ka humbur prej kohësh rolin e titullarit tek United, por duket se Jim Ratcliffe sheh ende potencial dhe mundesi tek hollandezi.
