Hollandezi Erik ten Hag është konfirmuar zyrtarisht si trajneri i ri i Manchester United. Tekniku i Ajax do të marrë drejtimin e skuadrës në fund të sezonit dhe kjo padyshim që do të shoqërohet me afrime dhe largime nga “Djajtë e Kuq”.
Por cilët janë emrat më pikantë që mund t’i bashkohen United sezonin e ardhshëm, dhe cilët janë ata që do largohen?
Në mbrojtje, lojtari i Ajax, Noussair Mazraoui, mund të ndjekë Ten Hag dhe t’i bashkohet teknikut në Old Trafford. Presnel Kimpembe i Paris Saint-Germain është gjithashtu nën radarin e Ten Hag, ndërsa një tjetër opsion është dhe Antonio Rudiger i Chelsea. Këtij të fundit i skadon kontrata në fund të sezonit dhe United mund të përfitojë me kosto zero kartonin e tij.
Përsa i përket mesfushës, objektivi kryesor i United mbetet i pandryshuar. Bëhet fjalë për Declan Rice të West Ham. Kartoni i mesfushorit vlerësohet në shifrat e 75 milionë eurove nga Transfermarket, por West Ham kërkon më shumë për shërbimet e tij. Kjo mund të jetë një pengesë dhe për këtë arsye United ka nevojë për një plan rezervë. Alternativa mund të jetë Ruben Neves i Wolves.
Në sulm, 2 objektivat kryesorë janë Harry Kane dhe Christopher Nkunku. Ky i fundit ka shënuar plot 30 gola në 19 takime gjatë këtij sezoni.
Përsa i përket largimeve, Paul Pogba, Nemanja Matic, Jesse Lingard, Edinson Cavani, Juan Mata dhe Lee Grant mund të largohen të gjithë me kosto zero në fund të sezonit, duke qënë se kontrata e tyre me klubin skadon në verë. Aaron Wan-Bissaka, Eric Bailly, Phil Jones, Alex Telles, Anthony Martial dhe Marcus Rashford gjithashtu janë drejt largimit. Donny van de Beek ndërkohë mund të qëndrojë dhe sezonin e ardhshëm tek United, duke qënë se ka punuar më parë me trajnerin Ten Hag.