Drejtuesit e Manchester United kanë vënë në shënjestrën e tyre mbrojtësin e Wolves, Max Kilman. Ky i fundit është aktivizuar rregullisht me ekipin e tij këtë sezon, dhe ka impresionuar me paraqitjet pozitive, duke tërhequr vëmendjen e disa klubeve rivale në Premier League.
Erik ten Hag ka nevojë më shumë se kurrë për përforcime në repartin difensiv, teksa Lisandro Martinez dhe Victor Lindelof i janë shtuar tashmë listës së gjatë të dëmtimeve. Varane ndërkohë gjithashtu ka vuajtur dëmtime në mënyrë të vazhdueshme, dhe “Djajtë e Kuq” kanë nevojë për më shumë konsistencë në mbrojtje.
Kilman është aktivizuar 36 herë me Wolves këtë sezon në të gjitha kompeticionet. Mbrojtësi ka shënuar 2 herë dhe ka dhënë dhe 1 asist. Lojtari ka patur rol mjaft të rëndësishëm në ekipin e trajnerit Gary O’Neil, teksa Wolves është ende në garë për të siguruar një vend në kompeticionet europiane sezonin e ardhshëm.
Ndërkohë, ish-lojtari i Watford, Troy Deeney, ka shprehur rezervat e tij për Kilman, duke vlerësuar aftësitë e lojtarit, por duke nënvizuar se transferimi tek Manchester United është një hap i madh në karrierë. Deeney komentoi:
“Më pëlqen Max Kilman. Unë thjesht mendoj se ka një nivel që jo të gjithë njerëzit mund ta arrijnë. Mbase gabohem. Shikoni se cfarë ndodhi me Harry Maguire, lojtar shumë i mirë tek Leicester City. Tek Manchester United, ku mundohen të luajnë me një linjë të lartë mbrojtëse duhet të jesh shumë më i aftë në kontrollin e topit. Të luash për Wolves dhe të luash për Manchester United janë dy gjëra të ndryshme… Por nëse ai (Kilman) ia del, atëherë urime!”
Max Kilman u bë pjesë e Wolves nga Maidenhead United në vitin 2018, dhe deri më tani ka luajtur plot 143 ndeshje për ekipin e tij, përfshirë këtu dhe 4 paraqitje në Europa League.
