Mesfushori i Manchester United, Donny van de Beek, do të humbasë pjesën e mbetur të sezonit për shkak të një dëmtimi në gjur. Lajmi është konfirmuar nga vet trajneri Ten Hag, teksa Van de Beek pritet t’i rikthehet fushave të blerta vetëm sezonin e ardhshëm. Hera e fundit që lojtari u aktivizua me United ishte në sfidën ndaj Bournemouth në 3 janar, ku u zëvëndësua pranë fundit të pjesës së parë.
Trajneri Ten Hag komentoi situatën:
“Në planin afatgjatë gjërat duken mirë. Ai do të jetë i gatshëm për sfidat para-sezonale, për pjesën e mbetur të sezonit do të jetë i padisponueshëm. Mendoj se të gjithë po mendojmë për të në këto momente. Kur merr një dëmtim gjatë sezonit është e tmerrshme…është gjithmonë shumë zhgënjyese dhe jemi aty për lojtarët.”
Tekniku hollandez shtoi:
“Lojtarët e ndiejnë se po ndërtojmë diçka të mirë dhe duan të jenë pjesë e saj, të gjithë duan të jenë pjesë e saj.”
Ten Hag gjithashtu konfirmoi lajmin për transferimin e Wout Weghorst në formë huazimi. Megjithatë, trajneri bëri me dije se sulmuesi nuk do të jetë i gatshëm në sfidën ndaj City. “Djajtë e Kuq” do të përballen me kundërshtarët e tyre historikë ditën e nesërme. Mediat angleze zbuluan se drejtuesit e United nuk janë të interesuar për të blerë kartonin e hollandezit, teksa kërkojnë vetëm huazimin deri në fund të sezonit.
Një fitore ndaj Manchester City do të shkurtonte diferencën mes 2 ekipeve në vetëm 1 pikë, një arritje e jashtëzakonshme për United duke marrë parasysh startin problematik të sezonit. Nga ana tjetër, të besuarit e Pep Guardiolës duhet të fitojnë me patjetër, për të qënë sa më afër Arsenalit kryesues. Përballja pritet të jetë mjaft e luftuar, pavarësisht dominancës së City në derbit e fundit mes skuadrave.
