Sipas raportimeve më të fundit në Angli, Erik ten Hag do të nxisë drejtuesit e Manchester United të hidhen në sulm për sulmuesin brazilian të Ajax, Antony. Trajneri hollandez e sheh Antony si zëvëndësuesin ideal të Cristiano Ronaldo, në rast se ky i fundit largohet nga “Djajtë e Kuq”.
Sulmuesi portugez i ka kërkuar klubit të largohet këtë merkato, dhe nëse kjo konkretizohet, United do të ngelet me opsione shumë të limituara në sulm për sezonin e ardhshëm. Marcus Rashford asnjëherë nuk ia doli të përmbushte pritshmëritë sezonin e kaluar, ndërkohë që Antony Martial kaloi një sezon të dobët si i huazuar tek Sevilla.
Ronaldo ndërkohë shënoi 18 gola sezonin e kaluar. Kjo bëri që portugezi të përfshihej në “Skuadrën e Vitit” në Premier League. Megjithatë, CR7 kërkon të luajë në Champions League dhe United nuk ia mundëson dot këtë gjë. Kjo është arsyeja se përse trajneri Ten Hag kërkon të marrë sa më shpejt masat, për t’i paraprirë largimit të mundshëm të Ronaldo.
Pavarësisht kësaj, transferimi i Antony në Old Trafford nuk është një lëvizje e lehtë. Ajax kërkon 70 milionë paundë për kartonin e brazilianit dhe raportimet në Angli bëjnë me dije se United nuk është i gatshëm ta paguajë këtë shifër. Kjo është dhe arsyeja se përse Ten Hag po tregohet këmbëngulës me drejtuesit e klubit, të cilët i frikësohen reagimit që mund të sjellë shitja e Cristiano Ronaldo.
“Djajtë e Kuq” gjithashtu synojnë të sjellin në Old Trafford Frenkie de Jong të Barcelonës dhe Lisandro Martinez të Ajax. Presioni nga tifozët është gjithnjë e në rritje, teksa klubi nuk ka arritur të zyrtarizojë asnjë afrim të rëndësishëm deri tani në këtë merkato vere. Mbetet të shohim nëse listës së largimeve të United do t’i shtohet dhe Cristiano Ronaldo.
