Frenkie de Jong është mesfushori i rradhës që sipas raportimeve, ka refuzuar një transferim drejt Manchester United. Erik ten Hag do të jetë trajneri i ri i “Djajëve të Kuq” sezonin e ardhshëm, dhe tekniku ka nisur që tani me piketimin e lojtarëve kryesorë që dëshiron të shohë në Old Trafford në verë.
De Jong është një prej tyre dhe kjo nuk është aspak një zgjedhje e rastësishme nga ana e Ten Hag. Trajneri ka trajnuar më parë mesfushorin e Barcelonës, kur ky i fundit ishte pjesë e Ajax. Lojtari nuk mund të thuhet se ka shkëlqyer me paraqitjet e tij me katalanasit, që prej zbarkimit në Camp Nou në vitin 2019. Por mesa duket, De Jong ende i beson projektit të trajnerit Xavi. Mesfushori e konfirmoi këtë gjë dhe në intervistën e fundit për mediat ku tha:
“Më pëlqen shumë Barcelona. Me shumë mundësi do të firmosja një kontratë të re 6 vjeçare nëse do të ma propozonin.”
Fjalët e De Jong kanë qënë goditja e rradhës për trajnerin Ten Hag, i cili po has në vështirësi mjaft të mëdha për të sjellë në Old Trafford një mesfushor. Kalvin Phillips, Declan Rice dhe Jude Bellingham kanë qënë të gjithë nën radarin e hollandezit, por asnjë prej superstarëve nuk duket i interesuar drejt një transferimi tek United. Arsyeja kryesore është fakti se “Djajtë e Kuq” nuk do të luajnë në Champions League sezonin e ardhshëm.
Ten Hag po punon ndërkohë dhe me problematikat në dhomat e zhveshjes. Mësohet se trajneri do t’u kërkojë të gjithë lojtarëve që kërkojnë largimin nga United, të largohen përpara qershorit. Hollandezi kërkon të shmangë problemet e mëtejshme mes lojtarëve, dhe ka detyrën e vështirë të ringrejë United në nivelin e rivalëve si City, Liverpool, apo Chelsea.