Nëse Erik ten Hag vendoset në krye të pankinës së United, prioriteti i tij numër 1 do të jetë portugezi Ruben Neves. Lojtari aktivizohet me Wolverhampton në repartin e mesfushës dhe “Djajtë e Kuq” kanë tentuar disa herë ta sjellin në Old Trafford.
Sipas raportimeve të mediave angleze, trajneri Ten Hag është në bisedime të avancuara me drejtuesit e United, për të zëvëndësuar Ralf Rangnick në fund të sezonit. Tekniku i Ajax ka qënë prej vitesh një adhurues i Neves, pra përpara se lojtari të merrte vëmendjen e opinionit publik me performancat tek Wolves. Ten Hag ka ndjekur lojtarin që në periudhën kur ai luante si adoleshent me ekipin e Portos, dhe e sheh atë si zgjidhjen e shumë problemeve që United ka në mesfushë.
Gjatë merkatos së janarit, “Djajtë e Kuq” bënë një ofertë zyrtare për Neves duke ofruar 35 milionë paundë për kartonin e tij. Por drejtuesit e Wolves u treguan kokëfortë, duke bërë me dije se do të konsideronin vetëm ofertat mbi 40 milionë paundë për të lënë portugezin të lirë.
Mesfushori aktivizohet me Wolverhampton që prej vitit 2017 dhe ka ndihmuar ekipin të sigurojë vendin e vet në elitën e futbollit anglez (Premier League). Neves ka shprehur disa herë dëshirën e tij për të luajtur në Champions League, dhe kjo sigurisht përkthehet në largimin e tij nga Wolves. Kjo është dhe arsyeja se përse mesfushori ka ndalur bisedimet për një kontratë të re. Momentalisht Neves ka dhe 2 vite aktive në kontratën e tij aktuale me Wolves. Kjo gjë mund të shtyjë klubin që të pranojë më shpejt një ofertë të re nga United, duke qënë se ekziston gjithmonë mundësia që lojtari të largohet me kosto zero nëse koha kalon. Sipas raportimeve në këtë operacion mund të përfshihet super-agjenti Jorge Mendes.
