Arsenal është gati t’i ofrojë Romës plot 50 milionë paundë për kartonin e asit të tyre, Tammy Abraham. Ky i fundit ka performuar në mënyrë të shkëlqyer në Itali, që prej ardhjes nga Chelsea, duke shënuar deri më tani 24 gola për ekipin e Jose Mourinho.
Nëse Arsenal ia del të sigurojë një vend në Champions League sezonin e ardhshëm, drejtuesit e “topçinjëve” janë gati të bëjnë një ofertë zyrtare për Abraham. Mikel Arteta ka nevojë për opsione në sulm, sidomos nëse Arsenal do të garojë paralelisht kampionatit, dhe në kompeticionin elitar. Trajneri spanjoll kërkonte të sillte Tammy Abraham në Emirates që verën e kaluar, por sulmuesi iu bashkua Romës në Serie A.
Megjithatë, aventura e Tammy në Itali mund të jetë drejt fundit. Lojtari iu bashkua Romës me qëllimin kryesor që të aktivizohej në një ekip si titullar, duke qënë se e kishte humbur këtë status tek Chelsea. Por tani sulmuesi i kombëtares angleze ka përsëri opsione në Premier League. Roma do ta ketë mjaft të vështirë të kualifikohet në Champions League sezonin e ardhshëm, dhe kjo padyshim që do të ndikojë në vendimin e Abraham.
Kujtojmë se Chelsea gjithashtu mund të blejë përsëri kartonin e futbollistit, duke qënë se marrëveshja e firmosur në verë me Romën e parashikon këtë skenar. Gjithsesi, blutë e Londrës duhet të paguajnë 68 milionë paundë për të risjellë Abraham në Stamford Bridge. Megjithatë, transferimi drejt Arsenal është skenari që ka më shumë mundësi të realizohet.
Roma gjithashtu nuk pritet të refuzojë ofertën e klubit londinez. Italianët janë të prirur të pranojnë marrëveshjen duke qënë se gjithsesi kanë një përfitim financiar. Kjo pasi Roma bleu kartonin e Abraham për 34 milionë paundë vetëm para pak muajsh. 24 vjeçari ka shënuar 15 gola në Serie A gjatë këtij sezoni.
