Arsenal dhe Tottenham duket se do të garojnë në merkaton e verës, për shërbimet e mesfushorit të Leicester City, James Maddison. “Dhelprat” mund të heqin dorë nga lojtari i tyre për të investuar në reparte të tjera ku ekipi ka më shumë nevojë. Por pavarësisht kësaj, Leicester mendohet se kërkon plot 60 milionë paundë për shërbimet e anglezit.
Si Spurs, ashtu dhe Arsenal, janë admirues të vjetër të Maddison, i cili po kalon sezonin më të mirë të karrierës së tij me Leicester City. Megjithëse lojtari nuk është një sulmues tipik, por një mesfushor me tipare sulmuese, ai ka shënuar plot 13 gola. Ai ka dhe pak më shumë se 2 vite kontratë aktive me Leicester City.
Tottenham i është bashkuar së fundmi garës për Maddison, pasi trajneri Conte ndien nevojën për të pasur një “numër 10” në skuadrën e tij. Tekniku italian është një adhurues i 25 vjeçarit dhe kërkon të shtojë opsionet që ka në dispozicion përsa i përket sulmit. Sidomos pas largimeve të Dele Alli, Tanguy Ndombele dhe Giovani Lo Celso. Kartoni i Alli i takon tashmë Everton ndërsa Ndombele dhe Lo Celso po luajnë si të huazuar, respektivisht tek Lyon dhe Villarreal.
Gjithsesi, objektivi kryesor i Antonio Conte në merkato është një qëndër-mbrojtës i ri. Duke marrë parasysh këtë, mund të jetë mjaft e vështirë për Spursat që të bëjnë të mundur transferimin e Maddison në Wembley. Zgjidhja do të ishte shitja përfundimtare e kartonit të Ndombele apo Lo Celso, për të siguruar fondet e nevojshme për mesfushorin e Leicester.
Maddison nga ana e tij ende nuk ka shprehur se cilin ekip preferon si destinacionin e rradhës. Megjithatë, lojtari kërkon të jetë pjesë e kombëtares angleze në Botërorin e këtij viti. Për t’ia arritur këtij qëllimi, mesfushori duhet të luajë futboll në një ekip më elitar se Leicester City.
