Londinezët e Arsenal janë në kontakte me Barcelonën mbi mundësinë e transferimit të Raphinha dhe Ferran Torres në Emirates. Sipas raportimeve të 90min, Mikel Arteta është në kërkim të një anësori që prej merkatos së verës, dhe tentativat e derimëtanishme kanë dështuar.
Arsenal shfaqi interes konkret për Raphinha që verën e kaluar, por oferta e “topçinjëve” nuk e bindi lojtarin. Braziliani la ekipin e Leeds për t’iu bashkuar Barcelonës, duke refuzuar dhe Chelsea gjatë këtij procesi. Objektivi kryesor i Arsenal në këtë merkato ishte ukrainasi Mykhaylo Mudryk, por tani që ky i fundit iu bashkua Chelsea, drejtuesit e klubit janë përshirë në diskutime intensive me Barcelonën për të eksploruar alternativa të tjera.
Raphinha dhe Ferran Torres janë alternativa mjaft konkrete, teksa të dy lojtarët po kalojnë një periudhë me luhatje te Barcelona. Asnjëri prej tyre nuk ka konsoliduar dot rolin e titullarit, ndërkohë që vështirësitë financiare të Barcelonës mund t’ia bëjnë akoma më të lehtë Arsenal arritjen e një marrëveshjeje, për të paktën njërin prej anësorëve.
Në rast se asnjë prej futbollistëve nuk është i disponueshëm për një transferim, drejtuesit e Arsenal kanë dhe një plan B në mendje. Bëhet fjalë për anësorin e Brighton, Leandro Trossard. Ky i fundit ka kërkuar largimin nga klubi i tij aktual, lajm që është konfirmuar nga vet agjenti i futbollistit. Arsenal mund të sigurojë më lehtë kartonin e belgut, por për momentin drejtuesit e klubit janë më të përqëndruar tek Raphinha dhe Torres.
Paralelisht, “topçinjtë” janë duke monitoruar dhe talentin e Napoli, Khvicha Kvaratskhelia. Ky i fundit ka impresionuar me paraqitjet e tij të jashtëzakonshme në kampionatin italian. Megjithatë, Napoli nuk ka ndërmend ta lërë lojtarin të largohet lehtë. Italianët kërkojnë rreth 100 milionë paundë për kartonin e gjeorgjianit, një shifër që sipas të gjitha gjasave, Arsenal nuk është gati ta paguajë në këtë moment.
