Sipas raportimeve në mediat angleze, Arsenal po përgatit një ofertë zyrtare për sulmuesin Kosovar të Lille, Edon Zhegrova. Lojtari iu bashkua skuadrës franceze në janar, por ia ka arritur të impresionojë në fushën e blertë, gjatë kësaj kohe të shkurtër. Zhegrova erdhi nga skuadra e Basel në Zvicër, dhe deri më tani ka regjistruar 3 gola dhe 3 asiste, në 7 paraqitje me Lille në kampionat.
Mikel Arteta ka shpresë se mund të tundojë kosovarin t’i bashkohet “topçinjëve” në verë. Pas largimit të Pierre-Emerick Aubameyang në janar, Arsenal ka vuajtur shumë për të gjetur rrugën e rrjetës dhe ka nevojë për opsione në sulm. Kjo gjë u pa dhe në humbjen 1-0 ndaj Southampton, e cila ishte humbja e tretë rradhazi në Premier League.
Zhegrova, i cili aktivizohet në krah, ka potencialin t’i shtojë shpejtësi dhe vitalitet sulmit të Arsenal. Bukayo Saka ndërkohë nuk aktivizohet më në sulm, dhe është detyruar të adaptojë një rol më difensiv, për shkak të dëmtimit të Kieran Tierney.
Mediat angleze bëjnë me dije se klubi londinez mund të sigurojë shërbimet e kosovarit për shifrën e 11 milionë paundëve, plus bonuse. Kjo është një kosto totalisht e përballueshme për drejtuesit e Arsenal. Lille gjithashtu mendohet se nuk do të refuzojë ofertën e anglezëve. Francezët siguruan kartonin e Zhegrovës nga Basel për vetëm 7 milionë euro.
Sulmuesi firmosi kontratën e tij të parë profesionale në vitin 2017 me Gent në Belgjikë. Performancat e mira i siguruan një transferim në formë huazimi tek Basel, ku paraqitjet pozitive bënë që klubi zvicerian të blinte në mënyrë përfundimtare shërbimet e tij. Në qoftë se transferimi drejt Arsenal realizohet me sukses ky do të ishte një hap mjaft i madh në karrierën e kosovarit. Gjithsesi, Zhegrova ende nuk ka shprehur dëshirën për t’u larguar nga Lille.