Atletico Madrid ka blerë në mënyrë përfundimtare shërbimet e Antoine Griezmann nga Barcelona. Francezi do të jetë pjesë e madrilenëve deri në vitin 2026. Griezmann ishte pjesë e ekipit të Diego Simeone përpara se t’i bashkohej Barcelonës në vitin 2019. Aventura e tij me katalanasit rezultoi e komplikuar, teksa sulmuesi realizoi 35 gola në 102 ndeshje, përpara se t’i ribashkohej Atletico në formë huazimi.
31 vjeçari ka shënuar 3 gola dhe 2 asiste në 11 ndeshje që është aktivizuar këtë sezon. Por, duhet theksuar se Griezmann është aktivizuar si titullar në vetëm 3 prej tyre. Kjo nuk ka ardhur si pasojë e dëmtimeve apo zgjedhjeve të trajnerit Simeone, dhe në fakt, arsyeja është mjaft specifike.
Sipas gazetarit sportiv Guillem Balague, në kontratën e huazimit mes Atletico dhe Barcelonës, një kusht specific detyronte Atletico Madrid që të blinte mesfushorin për 40 milionë euro, vetëm nëse ky i fundit do të lunate më pak se 45 minuta, në 50% të ndeshjeve që do të aktivizohej. Megjithëse në dukje një kusht i çuditshëm, palët ranë dakord për kontratën dhe kjo “i ka hapur punë” trajnerit Simeone.
Tekniku argjentinas ka përdorur Griezmann si zëvëndësues pas minutës së 60’ në 8 nga 11 ndeshje të këtij sezoni. Në këtë mënyrë termat e kontratës janë ruajtur. Gjithsesi, tashmë francezi do të jetë zyrtarisht një lojtar i Atletico, dhe kjo do të thotë se mund të aktivizohet për 90 minuta të plota në çdo sfidë.
Sulmuesi sipas të gjitha gjasave do të luajë takimin e tij të parë si lojtar i madrilenëve në Champions League, përballë Club Brugge. Griezmann duhet të performojë mirë në prag të botërorit, për të siguruar vendin e titullarit në përfaqësuesen franceze. Pavarësisht se sulmuesi është një nga të besuarit e trajnerit Deschamps, konkurrenca është mjaft e fortë tek “gjelat”.