Ylli brazilian i Leeds, Raphinha, është shënjestra më e fundit e Barcelonës për merkaton e ardhshme verore. Gjigandët spanjollë duan të kenë më shumë opsione në sulm për sezonin e ardhshëm, sidomos duke marrë parasysh largimin e mundshëm të Ousmane Dembele.
Katalanasit kanë një avantazh në garën për kartonin e Raphinha, pasi drejtuesit e klubit kanë një marrëdhënie të ngushtë me agjentin e lojtarit, Deco. Portugezi gëzon ende shumë respekt në Camp Nou, që nga koha kur luante si lojtar me Barcelonën, dhe dihet se blaugranat janë klubi i tij i zemrës. Leeds nga ana tjetër gjithashtu është i qartë për interesin e spanjollëve për lojtarin, pavarësisht se Barcelona ende nuk ka bërë një ofertë zyrtare për të.
Mediat në gadishullin iberik bëjnë me dije se katalanasit janë të gatshëm të ofrojnë 40 milionë euro për të sjellë brazilianin në Camp Nou. Por megjithëse kjo shifër është e konsiderueshme, ajo nuk i afrohet fare shumës që Leeds kërkon për shërbimet e lojtarit.
Anglezët kërkojnë 80 milionë euro për Raphinha, pasi besojnë se rrethanat i favorizojnë në këtë moment. Kjo pasi braziliani ka ende 2 vite kontratë aktive me klubin. Drejtuesit e Leeds i kanë ofruar disa mundësi të mira rinovimi futbollistit, por Raphinha ka vendosur të presë. Agjenti i tij, Deco, kërkon që klubi të nxjerrë zyrtarisht një klauzolë për prishjen e kontratës, pasi marrëveshja aktuale e brazilianit me klubin nuk e ka një të tillë.
Por Barcelona nuk është i vetmi klub që ka shprehur interes për lojtarin. West Ham deklaroi se kishte bërë një ofertë zyrtare në merkaton e janarit, ndërsa Liverpool, Newcastle dhe Manchester City gjithashtu janë linkuar me Raphinha.
Vet lojtari ndërkohë nuk ka shprehur ndonjëherë zyrtarisht dëshirën për t’u larguar. Për këtë mund të ketë ndikuar dhe marrëdhënia e mirë mes tij dhe trajnerit të ri të Leeds, Jesse Marsch.
