Bayern Munich po planifikon një lëvizje të bujshme në merkaton e verës. Bavarezët kërkojnë të sjellin në Allianz Arena mesfushorin e talentuar të Liverpool, Sadio Mane. Sipas raportimeve të mediave angleze, agjenti i lojtarit është tashmë në kontakte me drejtuesit bavarezë.
Kontrata aktuale e Mane me Liverpool skadon në vitin 2023, dhe bisedimet për një rinovim kanë rezultuar deri më tani të vështira. Kjo dhe për shkak të vet klubit, i cili është më shumë i përqëndruar për të bindur Mohamed Salah që të qëndrojë në Anfield. Sipas Sky Germany, Mane është i frustruar nga kjo situatë dhe Bayern është i gatshëm të përfitojë nga pakënaqësitë e krijuara.
Drejtori sportiv i Bayern, Hasan Salihamidzic, është takuar me agjentin e Mane dhe sipas burimeve të afërta me palët, klubi gjerman është i gatshëm të luftojë fort për të bërë të vetin kartonin e mesfushorit. Ky i fundit iu bashkua “The Reds” në vitn 2016 nga skuadra e Southampton. Lojtari ka shënuar 14 gola këtë sezon në Premier League, dhe 21 gjithsej në të gjitha kompeticionet. Këtë vit Mane shtoi në koleksionin e tij dhe trofeun e League Cup, teksa ka fituar kampionatin dhe Champions League-ën me anglezët.
Liverpool ndërkohë duhet të përgatitet për dy finale të tjera, atë të FA Cup, por më e rëndësishme akoma, atë të Champions League përballë Real Madrid. Premier League duket tashmë një mision shumë i vështirë pas barazimit me Tottenham, por gjithçka mund të ndodhë. Kjo do të thotë se Mane ka shanse të fitojë edhe 3 trofe të tjerë, përpara një largimi potencial drejt Bayern Munich në verë. Duke qënë se ka fituar gjithçka mund të fitonte me “The Reds”, Mane është i prirur të kërkojë aventurën e tij të rradhës diku jashtë Anglisë, dhe bavarezët janë një alternativë mjaft premtuese.
