Chelsea ka zyrtarizuar afrimin e sulmuesit francez Christopher Nkunku nga RB Leipzig. Blutë e Londrës do t’i paguajnë klubit gjerman 52 milionë euro për kartonin e lojtarit, i cili pritet të kthehet në një pikë të rëndësishme të sulmit tek Chelsea. Nkunku shënoi 16 gola në 25 ndeshje me Leipzig në Bundesliga, sezonin që lamë pas. Lojtari gjithashtu është aktivizuar në 10 paraqitje me kombëtaren franceze. Nkunku u shpreh mjaft i lumtur për aventurën e tij të re në Angli:
“Jam shumë i lumtur që po i bashkohem Chelsea. Një përpjekje e madhe u bë që unë të vija në klub. Jam shumë i emocionuar për këtë sfidë dhe do të jem krenar që do të vesh fanellën e Chelsea. Kam luajtur në Ligue 1 dhe në Bundesliga, dhe tani do të luaj në Premier League, një nga kampionatet më të forta në botë. Po pres të takoj trajnerin tim të ri dhe shokët e skuadrës, dhe t’i tregoj fansave të Chelsea se çfarë mund të bëj në fushë.”
Kujtojmë se Nkunku ka fituar 3 herë kampionatin francez me PSG, përpara se t’i bashkohej Leipzig në vitin 2019. Sulmuesi u kthye shumë shpejt në një superstar në Bundesliga, ku u shpall dhe lojtari i sezonit për sezonin 2021-2022, ku shënoi 20 gola dhe gjithashtu regjistroi 15 asiste.
Përpara se të largohej, Nkunku i dhuroi Leipzig trofeun e Kupës së Gjermanisë, pasi shënoi në finalen e këtij viti. Pavarësisht debutimit me Francën, për fat të keq lojtari nuk ia doli dot të ishte pjesë e ekipit në kupën e Botës. Kjo për shkak të një dëmtimi.
Sulmuesi është një vlerë e shtuar për Chelsea, që ishte prej kohësh në kërkim të një lojtari me cilësitë e francezit. Mbetet të shohim se si do të përshtatet Nkunku, në modelin e lojës të trajnerit Mauricio Pochettino.