Chelsea është gati të hidhet në sulm për Robert Lewandowski, duke garuar kështu në mënyrë direkte me Barcelonën për shërbimet e bomberit polak. 33 vjeçari e ka vendosur tashmë se do të largohet nga Bayern Munich, dhe arsyeja kryesore është dëshira për një sfidë të re. Sezonin që lamë pas, sulmuesi udhëhoqi bavarezët drejt titullit të 10 rradhazi kampion në Bundesliga.
Barcelona ka qënë prej kohësh destinacioni numër 1 për bomberin sipas mediave sportive, por situata është e komplikuar. Bayern kërkon 42 milionë paundë si parapagesë për kartonin e Lewandowski, dhe kjo është një shumë mjaft e madhe për Barcelonën, duke marrë parasysh problemet financiare të spanjollëve.
Klubet rivale europiane e dinë mjaft mirë këtë gjë, dhe janë hedhur tashmë në sulm për shërbimet e sulmuesit. Trajneri i Chelsea, Thomas Tuchel, ka nevojë për eksperiencë në vijën e sulmit, dhe Lewandowski e plotëson mjaft mirë këtë kusht. Ende nuk ka një ofertë konkrete, por mësohet se drejtuesit e bluve të Londrës janë duke përgatitur propozimin e tyre. Polaku është gjithashtu një opsion më i mirë sesa Cristiano Ronaldo, duke marrë parasysh se portugezi është 37 vjeç. Ky i fundit është përfolur për një lëvizje drejt Stamford Bridge gjatë kësaj jave.
Lewandowski ndërkohë shënoi 50 gola në të gjitha kompeticionet sezonin e kaluar. Polaku nuk e ka mbajtur të fshehtë dëshirën e tij për t’u larguar nga Bayern, pavarësisht faktit se i është bashkuar ekipit për seancat stërvitore para-sezonale. Muajin e kaluar, gjatë ndeshjeve të kombëtares polake, Lewandowski u shpreh:
“Dua thjesht të largohem nga Bayern. Besnikëria dhe respekti janë më të rëndësishme sesa puna. Gjëja më e mirë që mund të bëjmë është të gjejmë një zgjidhje së bashku. Ata (drejtuesit e klubit) nuk deshën të më dëgjonin deri në fund. Diçka brenda meje “vdiq” dhe është e pamundur ta kaloj këtë fakt.”