Chelsea mund të ketë gati një ofertë ambicioze për kartonin e kapitenit të Manchester United, Harry Maguire. Blutë e Londrës janë në kërkim të përforcimeve në mbrojtje, dhe alternativa kryesore për momentin është Wesley Fofana i Leicester City. Por në qoftë se kjo pistë dështon, blutë e Londrës po konsiderojnë seriozisht një lëvizje për Maguire.
Fofana ndërkohë ka qënë prej kohësh objektivi kryesor i Thomas Tuchel, por Chelsea është përballur me refuzime të njëpasnjëshme nga “dhelprat”, në përpjekje për të siguruar një marrëveshje. Londinezët kanë bërë deri më tani 2 oferta zyrtare të cilat janë refuzuar, ndërkohë që burime pranë mediave angleze bënë me dije se një ofertë e tretë prej më shumë se 70 milionë paundësh, gjithashtu nuk është marrë parasysh nga Leicester City.
Vet lojtari kërkon t’i bashkohet ekipit të Tuchel, dhe është lënë jashtë listës së skuadrës në 2 ndeshjet e fundit, si dhe është stërvitur me ekipin U23 si formë ndëshkimi, pasi dështoi të vinte në kohë në një seancë rutinë stërvitore.
Nëse skenari Fofana nuk realizohet, Chelsea do të bëjë një ofertë për Maguire, duke u nisur dhe nga situata e vështirë e lojtarit në Old Trafford. Maguire u la në stol nga trajneri Ten Hag, në fitoren e Manchester United ndaj Liverpool. Tekniku hollandez zgjodhi të aktivizojë në mbrojtje Rafael Varane së bashku me Lisandro Martinez. Burime të afërta pranë United bëjnë me dije se Maguire është ende në planet e Erik ten Hag, por mbrojtësi nuk shihet më si një figurë e pazëvëndësueshme tek United.
Paralelisht me përforcimet në mbrojtje, Thomas Tuchel kërkon të sjellë opsione të reja dhe në repartin e sulmit. Emrat më të lakuar së fundmi janë Pierre-Emerick Aubameyang i Barcelonës dhe Anthony Gordon i Everton. Gjithsesi, ende nuk ka asnjë ofertë zyrtare nga Chelsea për lojtarët.