Drejtuesit e Chelsea i kanë komunikuar Romelu Lukakut se sulmuesi është i lirë t’i bashkohet përsëri italianëve të Inter në formën e huazimit, nëse propozimi financiar është i pranueshëm. Belgu kërkon dëshpërimisht një rikthim në Itali, pas një sezoni të dobët në Premier League. Ai u bë pjesë e bluve të Londrës në fillim të sezonit që lamë pas, për shifrën rekord prej 97.5 milionë paundësh, por arriti të shënonte vetëm 15 gola në të gjitha kompeticionet.
Duket se ka një dëshirë nga të gjitha palët e përfshira, që transferimi të realizohet. Gjithsesi, shumë gjëra do të varen nga aftësitë financiare të Inter për të përballuar shpenzimet e Lukaku. Zikaltërit nuk kanë mundësi financiare për të blerë kartonin e tij, por dhe një transferim në formë huazimi mund të rezultojë i papërballueshëm. Chelsea mund të kërkojë deri në 25 milionë paundë për këtë transferim. Për më tepër, anglezët pritet t’i faturojnë Inter një pjesë të madhe të pagës së sulmuesit, e cila nuk është pak por plot 325 mijë paundë në javë.
Vështirësitë financiare ishin pikërisht arsyeja se përse Inter vendosi të shesë Lukaku vitin e kaluar. Zikaltërit janë gjithashtu në tentativa për të sjellë në San Siro argjentinasin e Juventus, Paulo Dybala. Këtij të fundit i skadon kontrata në fund të muajit dhe ka zyrtarizuar tashmë largimin nga “Zonja e Vjetër”. Por destinacioni i rradhës ende nuk dihet për asin argjentinas.
Gjithsesi, edhe nëse sigurojnë shërbimet e Dybala me kosto zero, largimi i lojtarëve është një hap i pashmangshëm nëse Inter kërkon me patjetër rikthimin e Lukaku. Alessandro Bastoni mund të largohet drejt Tottenham, ndërsa Milan Skriniar ka kapur interesin e Chelsea. Inter gjithashtu është i gatshëm të pranojë oferta për Lautaro Martinez, por ideale për zikaltërit do ishte ribashkimi i tij me Lukaku. Kjo pasi dyshja pati një bashkëpunim fantastik përpara dy sezonesh, kur zikaltërit ngritën lart trofeun e Serie A.